بنگلورو، یکم اپریل (ایس او نیوز) دہلی کے مرکز نظام الدین میں 10/ مارچ کو ہوئے اجتماع میں شریک افراد میں سے 24 کے کورونا وائرس کا شکار ہوجانے اور ان میں سے6/افراد کی موت کی خبروں کے بعد اس مرکز کے اجتماع میں شرکت کے بعد اپنے اپنے مقامات پر لوٹنے والے افراد کی نشاندہی کر کے انہیں کورانٹائن کرنے کا سلسلہ شروع ہوا ہے۔ اسی سلسلے کی ایک کڑی کے طور پر کرناٹک میں بھی ایسے افراد کی نشاندہی کا کام شروع کیا گیا ہے۔

 یہ بات ریاستی وزیر صحت بی سری راملو نے کہی ٹوئٹر پر انہوں نے لکھا ہے کہ دہلی کے مرکز نظام الدین میں مارچ کے اوائل میں منعقدہ اجتماع میں کرناٹک سے 45/ افراد کے شریک ہونے کی اطلاعات ہیں۔

 ان میں سے ایک ٹمکورو کے سرا کے متوطن صاحب کی موت بھی کورونا سے واقع ہوچکی ہے۔ اس لئے ریاستی حکومت کی طرف سے اس اجتماعی میں شریک افراد کی نشاندہی کر کے انہیں کوارنٹائن کرنے کے لئے ہدایات جاری کی جاچکی ہیں۔
 
سری راملو نے کہا ہے کہ اس اجتماع میں سنگاپور، آسٹریلیا، دوبئی، سعودی عرب اور دیگر ممالک سے آنے والی جماعتوں نے حصہ لیا۔ اس لئے اس خطرہ کو ٹالا نہیں جاسکتا کہ اس اجتماع میں شریک ہونے والے افراد کے ذریعہ کورونا وائرس پھیل سکتا ہے۔ اس لئے ریاستی حکومت نے اس اجتماع میں کرناٹک سے حصہ لینے والے افراد کی نشاندہی کر کے ان کو کورانٹائن کرنے کے لئے کارروائی شروع کی ہے۔ 

سری راملوں نے کہا کہ ان میں سے 13/ افراد کی نشاندہی کر کے انہیں پہلے ہی الگ تھلگ کردیا گیا ان کی جانچ کے بعد یہ تصدیق ہوئی ہے کہ ان میں سے کسی کو کورونا وائرس نہیں ہے۔ 

دوسری طرف وزیر داخلہ بسوراج بومئی نے کہا کہ 10/ مارچ کو دہلی کے مرکز نظام الدین میں ہوئے اجتماع میں شرکت کے لئے کرناٹک سے 50/ لوگوں کے جانے کی اطلاعات ہیں۔ انہوں نے کہا کہ میں سے 11 کا تعلق ٹمکورو ضلع کے سرا سے ہے۔ ان تمام کی نشاندہی کر کے انہیں کوارنٹائن کیا جائے گا۔ ٹمکورو کے سراکے بعد اب یہ بات سامنے آئی ہے کہ نظام الدین کی بنگلہ والی مسجد میں اجتماع ہو ااس میں کرناٹک کے بیلگاوی ضلع کے 10افراد نے شرکت کی۔ ضلع انتظامیہ نے ان کی نشاندہی کر کے انہیں کورانٹائن کرنے کی تیاری شروع کردی ہے۔ بتایا جاتا ہے کہ ان تمام کے خون کے نمونے جانچ کے لئے روانہ کردیئے گئے ہیں اور ان کی سخت نگرانی کرنے کی ہدایت دی گئی ہے۔

 اس دوران وزیر صحت سری راملو نے کہا کہ حکومت کی طرف سے یہ نشاندہی کی گئی ہے کہ نظام الدین کے اس اجتماع میں حصہ لینے والے 26افراد کا تعلق بیدر سے ہے ان تمام کوکوارنٹائن کیا گیا ہے۔ 

اس دوران محکمہ پولیس کے ایک اخباری بیان میں بتایا گیا ہے کہ کرناٹک کے مختلف حصوں میں واقع مساجد میں مقیم بیرون ملکی تبلیغی جماعتوں کی نشاندہی کر کے ان میں شامل لوگوں کو احتیاطاً جہاں ہیں اسی مقام پر کورانٹائن کردیا گیا ہے۔ ان میں کرغستان کے 19/ انڈونیشیا کے 20، جنوبی آفریقہ کے 4، گامبیا کے 3، امریکہ، برطانیہ، فرانس اور کینیاکے ایک ایک فرد کو کورانٹائن کیا گیا ہے۔ 

اس دوران بتایا گیا ہے کہ دہلی کے مرکز نظام الدین کے اجتماع میں شریک 300افراد کی ریاست بھر میں نشاندہی کر کے انہیں کورانٹائن کردیا گیا ہے جہا ان کی طبی جانچ کی جارہی ہے۔ حکومت نے مرکز نظام الدین میں شرکت کرنے والے افراد سے گزارش کی ہے کہ وہ رضا کرانہ طور پر آگے آئیں اور اپنی جانچ کروائیں تا کہ کورونا وائرس کے خطرے کو ٹالا جاسکے۔