دبئی،16 /ستمبر(ایس او نیوز/ آئی این ایس انڈیا) مرد کرکٹ ورلڈ کپ 2019 بین الاقوامی کرکٹ کونسل کا سب سے زیادہ دیکھا جانے والا ٹورنامنٹ بن گیا ہے جس کا براہ راست نشر عالمی سطح پر اوسطا ایک ارب 60 کروڑ لوگوں نے دیکھا۔آئی سی سی نے پریس ریلیز میں کہاکہ ڈیجیٹل طریقے سے براہ راست نشریات کے معاملے میں ہندوستان سب سے اوپر رہا جس میں ہاٹ اسٹار نے ہندوستان اور نیوزی لینڈ کے درمیان سیمی فائنل میں دو کروڑ 53 لاکھ ناظرین نے میچ لائیو دیکھنے کا ریکارڈ بنایا۔آئی سی سی کے 25 نشریات شراکت داروں نے 200 سے زائد علاقوں میں 20000 سے زیادہ گھنٹوں کا براہ راست نشر، ری پیٹ اور اہم حصہ مہیا کرائے۔ریلیز کے مطابق اس مقابلے کے ناظرین میں 2015 کے سیشن کے مقابلے میں 38 فیصد اضافہ ہوا ہے۔بیان میں کہا گیاکہ عالمی سطح پر سب سے زیادہ دیکھا جانے والا میچ ہندوستان بنام پاکستان رہا جسے 27 کروڑ 30 لاکھ ٹی وی ناظرین ملے اور پانچ کروڑ دیگر نے ڈیجیٹل طریقے سے دیکھا۔