اُترکنڑا میں بھی کورونا کے معاملات میں ہورہا ہے اضافہ کاروار کے 2افراد نکلے کووِڈ پوزیٹیو
کاروار،7؍جون (ایس او نیوز)ریاستی محکمہ صحت کی جانب سے سنیچر کے دن شام کو جاری کیے گئے ہیلتھ بلیٹین کے مطابق کاروار سے تعلق رکھنے والے 2افراد کی جانچ رپورٹ کووِڈ پوزیٹیو نکلی ہے۔
بتایا جاتا ہے کہ ان دونوں میں سے ایک شخص بین الاقوامی ہوائی سفر سے یہاں پہنچا تھا جبکہ دوسر ی خاتون بیرون ریاست سے سفر کرکے لوٹی تھی۔قطر سے 22مئی کو سفر کرکے لوٹنے والا 34سالہ شخص اسی دن رات کو بنگلورو ہوائی اڈے پر اترا تھا۔ وہاں اسے کوارنٹین کرتے ہوئے اس کے گلے سے تھوک کا نمونہ جانچ کے لئے بھیجا گیا۔ایک ہفتے تک کوارنٹین میں رکھنے اور رپورٹ نگیٹیو آنے کے بعد 30مئی کو بنگلورو سے نجی بس میں ہبلی آکر وہاں سے سرکاری بس کے ذریعے وہ 31مئی کوکاروار پہنچا تھا۔لیکن 3جون سے اس شخص کے اندر کووِڈ کی علامات ظاہر ہونے لگیں تو دوبارہ اس کے گلے سے سیمپل لے کر جانچ کے لئے بھیجا گیا اور وہ رپورٹ پوزیٹیو آئی ہے۔اس لئے اس شخص کو کِمس ہاسپٹل میں داخل کیا گیا ہے۔
دوسری 16سالہ خاتون مہاراشٹرا سے نیتراوتی ٹرین کے ذریعے 4جون کوکاروار پہنچی تھی۔سنیچر کے دن اس کے سیمپل کی رپورٹ پوزیٹیو آئی جس کے بعد اس کو بھی کاروار میڈیکل کالج کے اسپتال میں داخل کیا گیا ہے۔