بنگلورو، 30/ جولائی (ایس او نیوز /ایجنسی) بنگلورو کے ڈی جے ہلی علاقے میں خصوصی انتخابی نظرِ ثانی (SIR) کی ڈیوٹی انجام دینے والے ایک سرکاری افسر پر مبینہ حملے کا معاملہ سامنے آیا ہے، جس کے بعد دیوراجیونہلی پولیس نے متعدد افراد کے خلاف مقدمہ درج کرکے تحقیقات شروع کردی ہیں۔

پولیس میں درج پہلی اطلاعی رپورٹ (ایف آئی آر) کے مطابق 37 سالہ پاکیراپا، جو سلم بورڈ میں سپرنٹنڈنٹ ہیں، انہیں پلکیشی نگر ریونیو دفتر کی جانب سے وارڈ نمبر 47 میں بوتھ سطحی افسران (بی ایل اوز) کی نگرانی کے لیے سپروائزری افسر مقرر کیا گیا تھا۔

شکایت کے مطابق چہارشنبہ کی دوپہر تقریباً 1:30 بجے وہ روشن نگر 18ویں کراس میں واقع کوثر مسجد کے قریب ایس آئی آر مہم کا جائزہ لے رہے تھے۔ اسی دوران انہوں نے ایک مقامی بی ایل او اور دو نوجوانوں کے درمیان تلخ کلامی دیکھی۔

پولیس کے مطابق دونوں نوجوانوں، جن کی شناخت یارب اور دستگیر کے طور پر ہوئی ہے، نے بی ایل او سے ایس آئی آر فارم کا مطالبہ کیا۔ بی ایل او نے انہیں بتایا کہ چونکہ ان کی رہائش جے نگر علاقے میں ہے، اس لیے وہ اپنے متعلقہ حلقے سے فارم حاصل کریں، جس پر دونوں کے درمیان بحث شروع ہوگئی۔

شکایت میں پاکیراپا نے بتایا کہ جب انہوں نے مداخلت کرتے ہوئے معاملہ پرسکون کرنے کی کوشش کی اور نوجوانوں سے ہنگامے کی وجہ پوچھی تو ان میں سے ایک نے مبینہ طور پر ان کے منہ پر مکا مار دیا، جس سے ان کے ہونٹ سے خون بہنے لگا۔ اس کے بعد دوسرے ملزم نے ان کی آنکھ اور پیٹھ پر بھی حملہ کیا۔

اطلاع کے مطابق موقع پر موجود مقامی افراد نے مداخلت کرکے جھگڑا ختم کرایا۔

واقعے کے بعد پاکیراپا نے اپنے اعلیٰ حکام کو اطلاع دی، امبیڈکر اسپتال میں طبی معائنہ کرایا اور بعد ازاں پولیس میں باقاعدہ شکایت درج کرائی۔

دیوراجیونہلی پولیس نے یارب، دستگیر، اقبال اور دیگر کے خلاف بھارتیہ نیائے سنہتا، 2023 کی متعلقہ دفعات 121(1)، 132، 352 اور 3(5) کے تحت مقدمہ درج کرلیا ہے۔ پولیس کا کہنا ہے کہ واقعے کی مزید تحقیقات جاری ہیں۔