وائناڈ، 12/ نومبر (ایس او نیوز /ایجنسی)کیرالہ  کے وائناڈ میں دو مسلمان بھائیوں نے ہندو خاتون کی آخری رسومات مکمل ہندو رسومات کے ساتھ ادا کیں۔ ان دونوں بھائیوں نے تقریباً پانچ دہائیوں تک بزرگ خاتون کی اپنی ماں کی طرح دیکھ بھال کی۔ کیرالہ  کے وزیر اعلی وی ڈی ستھیسن نے سوشل میڈیا پلیٹ فارم ایکس پر اس واقعے کی تعریف کی۔ انہوں نے لکھا، "یہ وہ کیرالہ ہے جسے میں جانتا ہوں، پیار کرتا ہوں اور اس پر یقین رکھتا ہوں۔"

85 سالہ کلیانی اماں، جو وائناڈ کے موپیناد پنچایت میں چتراگری کی رہنے والی تھیں، حال ہی میں انتقال کر گئیں۔ کلیانی اماں کی اپنی کوئی اولاد یا کوئی اور رشتہ دار نہیں تھا۔ ان کے پڑوس میں رہنے والے دو بھائی رزاق اور سلیمان گزشتہ 50 سالوں سے اس کی دیکھ بھال کر رہے تھے۔

دونوں بھائیوں اور ان کے گھر والوں نے کلیانی اماں کی روزمرہ کی ضروریات کا خیال رکھا، بشمول ان کی دوائیں اور یہاں تک کہ انہیں اسپتال لے جانا۔ وہ بھی خاندان کی ہر تقریب کا حصہ لیتیں تھیں۔ کلیانی اماں نے ان کے ساتھ اپنے بیٹوں کی طرح سلوک کیا اور اپنی موت سے پہلے اپنی خواہش کا اظہار کیا تھا کہ وہ ان کی موت کے بعد ان کی آخری رسومات ادا کریں۔

کلیانی اماں کی آخری خواہش کا احترام کرتے ہوئے، رزاق اور سلیمان نے مقامی ہندو شمشان گھاٹ میں ان کی چتا  یعنی جنازے کو جلایا اور تمام آخری رسومات ادا کیں۔ وی ڈی ستھیسن  نے اپنی پوسٹ میں کہا کہ بھائیوں نے حقیقی بیٹوں کی محبت اور احترام کے ساتھ ماں کی آخری خواہش پوری کی۔ انہوں نے مزید لکھا، "ماں کی محبت کوئی مذہب نہیں جانتی، بیٹےکا فرض  کوئی ذات نہیں جانتا، اور غم ، محبت کی طرح، ہم سب کے لیے برابر ہے۔"

اس واقعہ کو کیرالہ کے جذبے کی دل دہلا دینے والی مثال قرار دیتے ہوئے وزیر اعلیٰ نے کہا کہ ریاست ایک ایسی سرزمین ہے جہاں "محبت کوئی مذہب نہیں جانتی، شفقت کوئی ذات نہیں جانتی، اور انسانیت ہمیں اکٹھا کرتی ہے۔" انہوں نے کہا کہ ہم سب ایک ہیں۔ کیرالم کا یہ عظیم جذبہ پورے ہندوستان کو متاثر کرے۔‘‘ کیرالہ کے وزیراعلیٰ نے کہا کہ انہوں نے رزاق سے فون پر بات کی اور ان سے اور ان کے بھائی سے ملنے کا وعدہ کیا ہے۔