کاروار، 23 مئی (ایس او نیوز): ضلع اُتر کنڑا میں جاری شدید بارش اور لینڈ سلائیڈنگ کے خدشے کے پیش نظر کمٹہ تعلقہ کے خائرے کے قریب واقع مرجان-کتگال سڑک کو احتیاطی تدابیر کے تحت عارضی طور پر بند کر دیا گیا ہے۔
اطلاعات کے مطابق کمٹہ میں نیشنل ہائی وے سے مرجان-کتگال کی جانب جانے والی اس سڑک کا ایک کنارہ گزشتہ دو دنوں سے جاری موسلا دھار بارش کے دوران کٹنے لگا تھا، جس سے یہ اندیشہ پیدا ہوا کہ مسلسل بارش کی صورت میں پوری پہاڑی کے ساتھ ساتھ یہ سڑک بھی منہدم ہو سکتی ہے۔
علاقے میں اس سڑک پر روزانہ بڑی تعداد میں گاڑیوں کی آمد و رفت ہوتی ہے، اور کسی بھی ممکنہ لینڈ سلائیڈنگ کی صورت میں جانی نقصان کا خطرہ موجود تھا۔ عوامی تحفظ کو مدنظر رکھتے ہوئے ضلع کی ڈپٹی کمشنر محترمہ کے. لکشمی پریا نے فوری کارروائی کرتے ہوئے سڑک کو عارضی طور پر بند کرنے کے احکامات جاری کیے ہیں۔
ضلعی انتظامیہ کی جانب سے جاری کردہ ہدایت کے مطابق نیشنل ہائی وے سے خائرے تک مرجان-کتگال روٹ پر ٹریفک کی آمد و رفت فی الحال معطل رہے گی۔ مسافروں کے لیے متبادل راستے بھی تجویز کیے گئے ہیں۔ کتگال کی سمت جانے والے افراد کو ہدایت دی گئی ہے کہ وہ کتگال-دیوگی-مرجان راستے سے سفر کریں، جبکہ مرجان سے آنے والے مسافر مرجان-دیوگی-کتگال روٹ اختیار کریں۔