ಭಟ್ಕಳ: ದಕ್ಷಿಣಭಾರತದ ಪ್ರಮುಖ ಧಾರ್ಮಿಕ ಶಿಕ್ಷಣ ಸಂಸ್ಥೆಯ ಸಂಸ್ಥಾಪಕ, ಅಧ್ಯಕ್ಷ ಹಾಗೂ ತಂಝೀಮ್ ಸಂಸ್ಥೇಯ ಪೋಷಕ ಡಾ.ಅಲಿ ಮಲ್ಪಾ ಸಾಹೇಬ್(೧೦೦) ಶುಕ್ರವಾರ ರಾತ್ರಿ ತಮ್ಮ ಸ್ವಗೃಹದಲ್ಲಿ ನಿಧರಾದರು. ಇವರು ಐದು ಪುತ್ರರು, ಐದು ಪುತ್ರಿಯರು ಹಾಗೂ ಅಪಾರ ಬಂಧುಬಳಗನವನ್ನು ಅಗಲಿದ್ದಾರೆ.
ಒಂದು ಶತಮಾನಗಳ ಕಾಲ ಬಾಳಿ ಬದುಕಿದ ತಮ್ಮ ಜೀವನದುದ್ದಕ್ಕೂ ಶಿಕ್ಷಣ ಹಾಗೂ ಸಮುದಾಯದ ಅಭಿವೃದ್ಧಿಗಾಗಿ ಶ್ರಮಿಸಿದ ಡಾ. ಅಲಿ ಮಲ್ಪಾ ಇಂದು ಇಹಲೋಕಕ್ಕೆ ವಿದಾಯ ಹೇಳುವುದರ ಮೂಲಕ ದೀರ್ಘವಿಶ್ರಾಂತಿಗೆ ಜಾರಿಕೊಂಡರು. 
ಇವರಿಗೆ ಕೆಲವು ದಿನಗಳಿಂದ ಅನಾರೋಗ್ಯ ಬಾಧಿಸುತ್ತಿತ್ತು. ಮಂಗಳೂರಿನಲ್ಲಿ ಚಿಕಿತ್ಸೆಯನ್ನು ನೀಡಲಾಗಿತ್ತಾದರೂ ಆರೋಗ್ಯದಲ್ಲಿ ಯಾವುದೇ ಸುಧಾರಣೆ ಕಾಣದೆ ಶುಕ್ರವಾರ ರಾತ್ರಿ ನಿಧರಾದರೆಂದು ಅವರ ಕುಟುಂಬ ಮೂಲಗಳು ದೃಡೀಕರಿವೆ. ಶನಿವಾರ ಝಹರ್ ನಮಾಝ್ ನಂತರ ನವಾಯತ್ ಕಾಲೋನಿ ಜಾಮಿಯಾ ಮಸಿದಿಯಲ್ಲಿ ಜನಾಝ ನಮಾಝ್ ನಿರ್ವಹಿಸಿ ಸಮೀಪದ ಖಬಸ್ಥಾನದಲ್ಲಿ ಧಫನ ಮಾಡಲಾಗುವುದು ಎಂದು ತಿಳಿದುಬಂದಿದೆ. 
ಇವರ ನಿಧನ ಸುದ್ದಿ ತಿಳಿಯುತ್ತಲೆ ನವಾಯತ್ ಕಾಲೋನಿಯಲ್ಲಿರುವ ಇವರ ಮನೆಗೆ ಜನರು ತಂಡೋಪತಂಡವಾಗಿ ಧಾವಿಸಿ ಬಂದು ಮೃತರ ದರ್ಶನ ಪಡೆದರು.ತಂಝೀಮ್ ಅಧ್ಯಕ್ಷ ಮುಝಮ್ಮಿಲ್ ಕಾಜಿಯಾ, ಉಪಾಧ್ಯಕ್ಷ ಇನಾಯತುಲ್ಲಾ ಶಾಬಂದ್ರಿ, ಪ್ರಧಾನ ಕಾರ್ಯದರ್ಶಿ ಮುಹಿದ್ದೀನ್ ಅಲ್ತಾಫ್ ಖರೂರಿ, ಕಾರ್ಯದರ್ಶಿ ಮೌಲಾನ ಸೈಯ್ಯದ್ ಯಾಸಿರ್ ಬರ್ಮಾವರ್ ನದ್ವಿ ಸೇರಿದಂತೆ ಹಲವು ಗಣ್ಯರು ಅವರ ಅಂತಿಮ ದರ್ಶನ ಪಡೆದು ಮೃತರ ಮಗ್ಫಿರತ್ ಗಾಗಿ ಪ್ರಾರ್ಥಿಸಿದರು. ಇವರ ನಿಧನಕ್ಕಾಗಿ ಹಲವು ಶಿಕ್ಷಣ ಸಂಸ್ಥೆಗಳು, ವಿವಿಧ ಸಂಘಟನೆ, ಜಮಾ‌ಅತ್ ಮುಖಂಡರು ಶೋಕವನ್ನು ವ್ಯಕ್ತಪಡಿಸಿದ್ದು ಮೃತರಿಗಾಗಿ ಪ್ರಾರ್ಥಿಸಿದ್ದಾರೆ. 
ಈ ಸಂದರ್ಭದಲ್ಲಿ ತಂಝೀಮ್ ಮುಖಂಡರು ಭಟ್ಕಳದ ಎಲ್ಲ ಮುಸ್ಲಿಮರಲ್ಲಿ ಅಂತಿಮ ಸಂಸ್ಕಾರದ ವರೆಗೆ ತಮ್ಮ ಅಂಗಡಿಮುಂಗಟ್ಟುಗಳನ್ನು ತೆರೆಯಬಾರದು ಎಂದು ಮನವಿ ಮಾಡಿಕೊಂಡಿದ್ದಾರೆ.