شندی، 21 /ستمبر (ایس او نیوز /ایجنسی)سوڈان میں سونے کی ایک کان کی سرنگ منہدم ہو گئی، جس کے نتیجے میں تقریباً 11 کانکنوں کی موت ہو گئی ہے، اور تقریباً 30 افراد کو بچا لیا گیا ہے، جبکہ دیگر لاپتہ کان کنوں کی تلاش جاری ہے۔ علاقائی باشندہ نے بتایا کہ شمال مشرقی بحیرہ احمر کی ریاست کے دور دراز علاقے ’اونی‘ میں کان منہدم ہونے کا حادثہ ہفتے کے روز رات میں پیش آیا تھا۔ سرکاری کمپنی ’سوڈانی منرل ریسورسز‘ کے ایک آفیسر نے بتایا کہ اتوار تک 11 لاشیں بر آمد کی گئیں اور 30 افراد کو بچا لیا گیا ہے۔ آفیسر نے نام نہیں بتانے کی شرط پر کہا کہ لاپتہ لوگوں کی تلاش جاری ہے۔ انہوں نے مزید بتایا کہ انہیں میڈیا سے بات کرنے کی اجازت نہیں تھی۔

یہ حادثہ ایک ہفتے کے اندر سوڈان میں سونے کی غیر رسمی کان منہدم ہونے کا دوسرا حادثہ ہے۔ یہ کانیں پورے سوڈان میں پھیلی ہزاروں چھوٹی اور غیر رسمی کانوں میں سے ایک ہے۔ ملک ایک ایسی جنگ میں الجھا ہوا ہے، جس نے ملک کے کچھ حصوں کو قحط جیسے حالات میں پہنچا دیا ہے۔ گزشتہ اتوار کے روز ملک کے مغربی حصے میں ایک دیگر سونے کی کان کی کئی سرنگیں منہدم ہونے کی وجہ سے کم از کم 82 لوگوں کی موت ہو گئی تھی۔ یہ علاقہ ’پیرا ملٹری ریپڈ سپورٹ فورسز‘ (آر ایس ایف) کے کنٹرول میں ہے، جو گزشتہ 3 برسوں کے زیادہ عرصے سے سوڈانی فوج سے لڑ رہی ہے۔

کمپنی نے ایک بیان میں کان کے منہدم ہونے سے جانیں گنوانے والوں کے اہل خانہ کو اظہار تعزیت پیش کی ہے، لیکن ہلاکتوں کی مکمل اطلاع نہیں دی۔ سونا پیدا کرنے والے ملک سوڈان میں کان منہدم ہونے سے ہونے والی اموات کوئی غیر معمولی بات نہیں ہے، کیونکہ یہاں حفاظتی معیار پر عمل نہیں کیا جاتا۔ اپریل 2023 میں سوڈان میں آر ایس ایف اور سوڈانی فوج کے مابین جنگ شروع ہونے کے بعد سوڈان مکمل جنگ کے حالات میں داخل ہو گیا۔ مانیٹرنگ گروپ ’آرمڈ کنفلیکٹ لوکیشن اینڈ ایونٹ ڈیٹا‘ کے مطابق اس جنگ میں کم از کم 59000 لوگ ہلاک ہوئے۔ امدادی تنظیموں کا کہنا ہے کہ یہ تعداد بہت کم کر کے بتائی گئی ہے اور حقیقت میں یہ تعداد بہت زیادہ ہے۔ اقوام متحدہ کے ذریعہ مقرر کیے گئے ماہرین کے مطابق آر ایس ایف کو فنڈ دینے کے لیے ملک سے کافی مقدار میں سونے کی اسمگلنگ کی گئی ہے۔ آر ایس ایف دارفر اور کورڈوفن علاقوں میں سونا پیدا کرنے والے علاقوں کو کنٹرول کرتا ہے۔