انکولہ13 جنوری (ایس او نیوز) اتر کنڑا ضلع کے انکولہ تعلقہ کے سُنکاسال گاؤں میں پیر کی شب بینک میں نقب زنی کی ناکام کوشش کی گئی۔ شرپسند عناصر نے بینک کے پچھلے حصے میں واقع (ٹوائلٹ) کی دیوار توڑ کر بینک کے اندر داخل ہونے کی کوشش کی، تاہم وہ اسٹرونگ روم توڑنے میں ناکام رہے اور بغیر کچھ حاصل کیے فرار ہو گئے۔
یہ واردات قومی شاہراہ 63 پر واقع سُنکاسال گاؤں میں بینک آف بڑودہ کی ایک شاخ میں پیش آئی، جو انکولہ کو یلاپور سے جوڑتی ہے۔ پولیس کے مطابق ملزمان نے بینک کے عقب میں موجود اس ٹوائلٹ کی دیوار توڑی جہاں سی سی ٹی وی کیمرہ نصب نہیں تھا، اور اسی راستے سے بینک میں داخل ہو کر اسٹرونگ روم کا دروازہ توڑنے کی کوشش کی۔
تاہم سخت سیکیورٹی اور مضبوط دروازے کے باعث ملزمان اپنے مقصد میں کامیاب نہ ہو سکے۔ صبح کے وقت جب بینک عملہ شاخ میں پہنچا تو ٹوائلٹ کی دیوار ٹوٹی ہوئی پائی، جس کے بعد فوری طور پر پولیس کو اطلاع دی گئی۔
اطلاع ملتے ہی انکولہ پولیس موقع پر پہنچی اور تفتیش کا آغاز کیا۔ واردات کی چھان بین کے لیے ڈاگ اسکواڈ کی خدمات بھی حاصل کی گئیں۔ اس موقع پر اتر کنڑا ضلع کے پولیس سپرنٹنڈنٹ ایم این دیپن نے بھی جائے واردات کا دورہ کیا اور صورتحال کا جائزہ لیا۔
پولیس نے معاملے کی تحقیقات شروع کر دی ہیں اور ملزمان کی تلاش جاری ہے۔