نئی دہلی،26مئی(ایس او نیوز؍آئی این ایس انڈیا)بی جے پی صدرامت شاہ نے آج کہاکہ کرناٹک کے سابق وزیراعلیٰ بی ایس یدی یورپا ریاست میں اگلے اسمبلی انتخابات میں بی جے پی کے وزیراعلیٰ کے عہدے کے امیدوارہوں گے۔ ریاست میں اگلے سال انتخابات ہونے والے ہیں۔امت شاہ نے صحافیوں سے بات چیت میں اشارہ دیاکہ گجرات میں وزیراعلیٰ وجے روپانی وزیراعلیٰ کے عہدہ کے لئے پارٹی کی پسندہوں گے۔بی جے پی صدر نے زور دے کر کہا کہ گجرات اسمبلی انتخابات میں بی جے پی 150 سے زائد سیٹیں جیتے گی جہاں اس سال کے آخر میں انتخابات ہونے ہیں۔ گجرات میں182 رکنی اسمبلی ہے۔امت شاہ نے اگرچہ کہا کہ پارٹی نے ہماچل پردیش میں پارٹی کے وزیراعلیٰ کے امیدوارکے بارے میں ابھی فیصلہ نہیں کیا ہے، جہاں گجرات کے ساتھ انتخابات ہونے ہیں۔انہوں نے کہاکہ کرناٹک میں یدی یورپا کی قیادت میں لڑاجائے گا۔ یہ پوچھے جانے پر کہ یدی یورپا صوبہ پارٹی صدرہیں، وہ وزیراعلیٰ کے عہدے کے امیدوار ہوں گے، امت شاہ نے کہاکہ ہاں، وہ ہوں گے۔ کرناٹک میں حال میں بی جے پی میں گروپ بندی کی خبریں آئی ہیں جہاں سابق نائب وزیراعلیٰ کے ایس یشورپپا کی قیادت والا گروہ یدی یورپاکی قیادت پرنشانہ سادھتا رہاہے۔اس کے بارے میں پوچھے جانے پر شاہ نے کہا کہ وہ جلد ہی ریاست کے دورے پرجانے والے ہیں۔ پارٹی نے حال ہی میں کچھ لیڈروں پرکارروائی کی ہے۔