بجلی گرنے سے منڈگوڈ میں ایک خاتون ہلاک؛ دو دیگر شدید زخمی
منڈگوڈ 18/نومبر (ایس او نیوز/نذیر تاڈپتری) ضلع اُترکنڑا کے منڈگوڈ تعلقہ کے ارشینگری میں بادلوں کی گرجدار آواز کے ساتھ گرنے والی ایک بجلی کی زد میں آکر ایک خاتون کی موقع پر ہی موت واقع ہوگئی جس کی شناخت ہیمنپّا لمانی (52) کی حیثیت سے کی گئی ہے۔ واقعے میں دو دیگر شدید زخمی ہوئے ہیں جنہیں منڈگوڈ تعلقہ اسپتال میں داخل کیا گیا ہے۔
ہیمنپّا اتوار شام کو کھیت میں کام کررہی تھی کہ اچانک بادل گرجنا شروع ہوگئے، جس کے ساتھ ہی ایک بجلی لپکی اور ہیمنپّا اُس کی زد میں آگئی۔ اس موقع پر اس کے ساتھ دو دیگر لوگ بھی کھیتوں میں کام کررہے تھے ،بجلی گرنے سے دونوں زخمی ہوئے ہیں جن کی شناخت گورو تپنّا لمانی اور لکشمی تپنّا لمانی کی حیثیت سے کی گئی ہے۔