کاروار 18؍اگست (ایس او نیوز)نیشنل ہائی وے 63پر بار بار رونما ہونے والے حادثات کے بارے میں ایک بات یہ بھی سامنے آرہی ہے کہ غیر سائنٹفک انداز میں کی گئی ہائی وے کی تعمیر بھی حادثات کا ایک بڑا سبب ہے۔معلوم ہوا ہے کہ اس پہلو کو دھیان میں رکھ کرضلع اُترکنڑا  سپرنٹنڈنٹ آف پولیس مسٹر  ونائک پاٹل نے  نیشنل ہائی ویز اتھاریٹیز کو مراسلہ بھیجتے ہوئے مطالبہ کیاہے کہ اس شاہراہ کو ازسرنو درست انداز میں تعمیر کیا جائے تاکہ حادثات پر قابو پایا جاسکے۔

ایک رپورٹ کے مطابق امسال جنوری سے اب تک نیشنل ہائی وے 63پر 83حادثات پیش آچکے ہیں، جن میں 21سے زیادہ جانیں تلف ہوئی ہیں، درجنوں لوگ زخمی ہوئے ہیں اور بھاری پیمانے پر گاڑیوں کا نقصان ہواہے۔مانا جاتا ہے کہ اس ہائی وے پر انکولہ اور یلاپور کے درمیان بڑی تعداد میں جو گھماؤ پائے جاتے ہیں وہاں اکثرگاڑیاں بے قابو ہوجاتی ہیں اور اسی وجہ سے حادثات ہورہے ہیں۔اس لیے یہاں پر موجود سڑک کے موڑ کم کرنا اور ہائی وے کو درست کرنا بہت ضروری ہوگیا ہے۔اس کے علاوہ ٹھیکیداروں کی طرف سے انکولہ سے ہبلی تک اس شاہراہ کے کنارے بھی بہت ہی غیر سائنٹفک انداز میں بنائے گئے ہیں جس سے گاڑیوں کو کنارے لگانا اور پھر اس پر قابو رکھنا مشکل ہوجاتا ہے۔ حادثات کی یہ بھی ایک وجہ سمجھی جاتی ہے۔

ڈسٹرکٹ ایس پی ونائک پاٹل نے بتایا کہ شاہراہ پر موجود خامیوں کو دور کرنے کے لئے ہم نے نیشنل ہائی ویز اتھاریٹی کو تحریر بھیجی ہے۔ ہائی وے کا الائن منٹ کرنایا اسے درست کرنا ہمارے دائرۂ اختیار میں نہیں ہے۔یہ ان کا کام ہے اس لئے انہیں مطلع کیا گیا ہے۔