تیزاب بھرے ہوئے ٹینکر میں شگاف۔ سڑک پر ایسڈ رِسنے سے لگی آگ۔ بڑا سانحہ ٹل گیا
اڈپی19؍اکتوبر(ایس او نیوز) آدھی رات کے وقت اڈپی سے منگلورو کی طرف جانے والے تیزاب بھرے ہوئے ٹینکر میں اچانک شگاف پیدا ہونے کی وجہ سے سڑک پر ایسڈ رِسنے لگا اور بہت دور تک سڑک پر آگ بھڑکتی دکھائی دی۔ لیکن سورتکل ٹول گیٹ پر موجود اہلکارکی چوکسی کی وجہ سے ایک بہت بڑا سانحہ ٹل گیا۔
معلوم ہوا کہ تیزاب بھرے ہوئے ٹینکر میں شگاف پیدا ہونے کی بات سے ٹینکر ڈرائیور غافل تھا۔ مگر سورتکل ٹول گیٹ پر موجود اہلکار نے جب دیکھا کہ جس طرف سے ٹینکر آیا اس جگہ سڑک پر آگ بھڑک رہی ہے۔ پھر جب ٹینکر کی جانچ کی گئی تو اس کے اندر شگاف پڑنے او ر اس میں سے تیزاب رِسنے کی بات سامنے آئی تو فوری طور پر فائر بریگیڈ کو اطلاع دی گئی ۔ فائر بریگیڈ کے عملے نے موقع پر پہنچ کر آگ بجھانے اور حالات کو کنڑول کرنے کا کام انجام دیا۔ اس طرح ٹول گیٹ کے اہلکار کی چوکسی کی وجہ سے ایک خطرناک حادثہ ٹل گیا۔ ویسے بھی آدھی رات کا وقت ہونے کی وجہ سے سڑک پر ٹریفک بہت ہی کم تھی۔البتہ ایسڈ رِسنے اور آگ لگنے کی وجہ سے سڑک کو تھوڑا بہت نقصان پہنچا ہے۔
