مینگلور کے قریب بنٹوال میں ٹرک کی الیکٹرک کھمبے سے ٹکر؛ ٹکر لگتے ہی آگ کے شعلے بلند؛ ڈرائیور بال بال بچا
مینگلور20/اپریل (ایس او نیوز) یہاں نیشنل ہائی وے 75 پر مینگلور کی طرف جانے والا ایک ٹرک بے قابو ہوکر سڑک کنارے واقع ایک الیکٹرک کھمبے سے ٹکراگیا ، اور ٹکر لگتے ہی آگ کے شعلوں میں لپٹ گیا۔حادثے میں ٹرک کو کافی نقصان پہنچا ہے، البتہ ٹرک ڈرائیور حادثے میں بال بال بچ گیا کیونکہ ٹکر لگتے ہی اُس نے ٹرک سے باہر چھلانگ لگادی تھی۔ حادثہ جمعرات علی الصباح گولی تھٹّو کے قریب سونم پاڑی دیہات میں پیش آیا۔
ذرائع سے ملی اطلاع کے مطابق ٹرک جیسے ہی بے قابو ہوا، اپنی راہ سے ہٹ کر ڈھلان کی طرف بڑھنے لگا اور قریب میں واقع ایک بجلی کے کھمبے سے تیز رفتاری کے ساتھ ٹکراگیا۔ ٹکر لگتے ہی ٹرک میں آگ لگ گئی۔ ٹرک ڈرائیور نے کمال ہوشیاری سے باہر چھلانگ لگائی اور اپنی جان بچالی۔
اطلاع ملتے ہی فائر بریگیڈ کا عملہ موقع واردات پر پہنچ گیا اور مقامی لوگوں کی مدد سے کچھ ہی دیر میں آگ پر قابو پالیا گیا۔