بھٹکل 24/جولائی (ایس او نیوز)  تعلقہ کے شرالی  چتراپور میں چوری کی ایک زبردست واردات پیش آئی ہے جس میں چوروں نے گھر کا دروازہ توڑ کر  اندر داخل ہوتے ہوئے الماریوں میں موجود لاکھوں مالیت کے زیورات پر ہاتھ صاف کرلیا ہے۔ چوری کی یہ واردات آج  منگل صبح   کو اُس وقت منظر عام پر آئی جب گھر کے افراد واپس گھر پہنچے۔

بتایا گیا ہے کہ  گھر کے لوگ پیر کو اپنے ایک رشتہ دار کےہاں منعقدہ پروگرام میں شریک ہونے کے لئے گئے تھے، رات کو موسلادھار بارش ہونے کی بنا پر واپس اُدھر ہی آرام کیا ۔  آج منگل صبح جب یہ لوگ واپس گھر آئے تو دیکھ کر حیران رہ گئے کہ دروازہ ٹوٹا ہوا ہے ، گھر کے اندر جانے پر پتہ چلا کہ الماریاں بھی کھلی پڑی ہیں اور پورا سامان زمین پر بکھرا پڑا ہے۔ جانچ کرنے پر پتہ چلا کہ الماریوں میں رکھی ہوئے سونے کے زیورات  غائب ہیں۔

اطلاع ملتے ہی بھٹکل ڈی وائی ایس پی ویلنٹائن ڈیسوزا، سرکل پولس انسپکٹر گنیش سمیت دیگر  عملہ موقع واردات پر پہنچا۔ بعد میں کاروار سے ڈاگ اسکواڈ اور فنگر پرنٹس کے ماہرین نے بھی موقع پر پہنچ کر تفتیش شروع کی۔

قریب چھ لاکھ مالیت کے زیورات کی چوری ہونے کی بات کہی جارہی تھی، مگر بھٹکل مضافاتی پولس تھانہ میں 3.30 لاکھ مالیت کے زیورات کی چوری ہونے کی شکایت درج کی گئی ہے ۔

بھٹکلمضافاتی   پولس چھان بین کررہی ہے۔