کمٹہ 3/جون (ایس او نیوز) تعلقہ کے گوڈے انگڈی میں رات کے کسی پہر میں وجیا بینک سے منسلک ایک اے ٹی ایم مشین کو توڑ کر رقم چرانے کی  کوشش کی گئی۔ اے ٹی ایم کو مکمل طور پر توڑ دیا گیا ، مگر رقم نکالنے میں لُٹیرے کامیاب نہ ہوسکے۔ یہ واردات آج اتوار صبح منظر عام پر آئی ہے۔

پتہ چلا ہے کہ لُٹیرے ایک کار پرآئے تھے اور سب سے پہلے بینک کے  اندر اور باہر موجود سی سی ٹی وی کیمرہ پر رنگ یا غالباً کپڑا  ڈال  دیا تھا۔

صبح واقعے کا پتہ چلتے ہی راہ سے گذرنے والے لوگوں نے پولس کو خبر کی اور جلد ہی پولس موقع پر پہنچ گئی۔

مشین کو بری طرح نقصان پہنچایا گیا ہے اور مکمل توڑ پھوڑ کرکے رقم باہر نکالنے کی بھرپور کوشش کی گئی ہے، مگر رقم کے خانے تک لُٹیروں کی رسائی نہیں ہوسکی  اور لُٹیرے غالباً باہر کسی کی آہٹ سن کر  فرار ہوگئے ہیں۔

کمٹہ پولس  تھانہ میں معاملہ درج کیا گیا ہے اور پولس چھان بین کررہی ہے۔