بنگلورو، 22ستمبر (ایس او نیوز؍عبدالحلیم منصور) ریاستی وزیر ٹرانسپورٹ ایچ ایم ریونا نے سابق وزیر اعلیٰ ایس ایم کرشنا کے داماد سدھارتھ کی رہائش گاہ اور ان کی کمپنی کیفے کافی ڈے پر انکم ٹیکس کے چھاپوں کو ایس ایم کرشنا پر دباؤ ڈالنے بی جے پی کی کوششوں سے تعبیر کیا، آج میسور میں اخباری نمائندوں سے بات چیت کرتے ہوئے انہوں نے کہاکہ ہر بار کانگریس یا کانگریس سے وابستہ رہ چکے لیڈروں کو ہی انکم ٹیکس کا محکمہ نشانہ بنارہاہے۔ اس صورتحال کو دیکھتے ہوئے یہ سوالات اٹھ رہے ہیں کہ سبھی بی جے پی لیڈران اس قدر غریب ہیں کہ انہیں بی پی ایل راشن کارڈ جاری کردیا جائے اور ان لوگوں کی آمدنی اتنی نہیں ہے کہ انکم ٹیکس ادا کرسکیں۔ انہوں نے کہاکہ ریاست بھر میں پچھلے تین سال کے دوران جو 90 فیصد انکم ٹیکس چھاپے مارے گئے ہیں ان میں کانگریس لیڈروں کو ہی نشانہ بنایا گیاہے۔ ریونا نے کہاکہ جہاں تک ریاست میں انکم ٹیکس کے چھاپوں کا سوال ہے اب تک کی فہرست میں یہی بات سامنے آئی ہے کہ کانگریسیوں کو ہی نشانہ بنایا گیا ہے۔ انہوں نے کہاکہ کانگریس کے سبھی قائدین کی منت سماجت کو نظر انداز کرتے ہوئے ایس ایم کرشنا نے بی جے پی میں شمولیت کیلئے جو عجلت ظاہر کی تھی، اس انکم ٹیکس چھاپے نے ان کے اس فیصلے کو غلط ثابت کر دیا ہے ۔