اسلام آباد،20؍مارچ(ایس او نیوز؍آئی این ایس انڈیا) پاکستان کرکٹ میں فکسنگ کی سامنے آنا کوئی نئی بات نہیں ہے لیکن جب ایک کرکٹر دوسرے کھلاڑیوں پر فکسنگ کا الزام لگائے تو پھر معاملہ سنگین ہو جاتا ہے۔ اس بار پاکستان کے سابق عظیم لیگ اسپنر عبدالقادر نے میچ فکسنگ معاملے کو لے کر ایک بیان دے کر پاکستان کرکٹ میں سنسنی مچا دی ہے۔پاکستان کے اس سابق قدآورا سپن بالر قادر نے ایک ٹی وی چینل پر کہا کہ وسیم اکرم، وقار یونس، انضمام الحق اور مشتاق احمد میچ فکسنگ کرتے تھے۔قادر نے کہا کہ انہیں کھلاڑیوں کی وجہ سے 90 کی دہائی کے آخری سالوں میں پاکستان کرکٹ میں میچ فکسنگ نے پاک کرکٹ میں دستک دی۔ قادر نے کہا کہ اگر ٹھیک وقت پر ان کھلاڑیوں کو پھانسی پر لٹکا دیا ہوتا تو میچ فکسنگ وہیں رک جاتی۔

واضح رہے کہ عبدالقادر نے جن سابق کھلاڑیوں پر فکسنگ کا الزام لگایا ہے وہ سب کے سب پاکستان کو بہت سے میچوں میں جیت دلا چکے ہیں۔ وسیم اکرم، وقار یونس پاکستان کے فاسٹ بالر رہے تو انضمام الحق بلے باز تھے اور مشتاق احمد ایک سپن بولر تھے۔ ان میں سے تین کھلاڑی تو پاکستان کے لئے الگ الگ وقت پر کپتانی بھی کر چکے ہیں۔ یہ چاروں ہی قدآور پاکستان کے لئے 90 کی دہائی میں کھیلتے تھے، تو ایسے میں عبدالقادر کے ان کھلاڑیوں پر یہ بڑا الزام لگانے کے پیچھے کوئی تو وجہ ہوگی۔

عبدالقادر ٹی وی چینل پر پاکستان سپر لیگ (پی ایس ایل) میں سپاٹ فکسنگ میں پھنس رہے کرکٹرز سے جڑے سوال پر جواب دے رہے تھے۔ حال ہی میں دبئی اور پاکستان میں کھیلی گئی پی ایس ایل لیگ میں پاکستان کے خالد لطیف، شرجیل خان، محمد عرفان، ناصر جمشید اور شاہ زیب حسن سمیت 5 کرکٹرز سپاٹ فکسنگ میں معطل ہو چکے ہیں۔ پی ایس ایل پاکستان کی گھریلو لیگ ہے اور اس لیگ کے دوران یہاں کئی کرکٹرز سپاٹ فکسنگ کے معاملے میں پھنسے ہوئے ہیں۔ایک انگلش اخبار کی ایک خبر کے مطابق اپنے اس بیان میں عبدالقادر یہیں نہیں رکے ۔انہوں نے کہا کہ میچ فکسنگ میں ملوث رہے پاکستانی کرکٹروں میں اکرم، انضمام اور مشتاق سمیت لمبی چوڑی فہرست ہے، اگر ان کرکٹرز کو پھانسی دی ہوتی تو آج پاکستان کرکٹ میں میچ فکسنگ تھم گئی ہوتی۔