آکلینڈ،17؍فروری(ایس او نیوز؍آئی این ایس انڈیا)عمران طاہر کی خطرناک گیند بازی کی بدولت جنوبی افریقہ نے آج کھیلے گئے واحد ٹی 20میچ میں نیوزی لینڈ کو آسانی سے 78رنز سے شکست دے دی۔ایڈن پارک میدان پر کھیلے گئے اس میچ میں دائیں ہاتھ کے اسپنر طاہر نے 24رنز دے کر پانچ کیوی بلے بازوں کو آؤٹ کیا۔مہمانوں کی طرف سے دئے گئے 186رنز کے ہدف کا تعاقب کرتے ہوئے میزبان ٹیم 14.5اوور میں 107رنز بنا کر آؤٹ ہو گئی۔میزبان ٹیم کی جانب سے ٹام بروس نے سب سے زیادہ 33رنز بنائے۔اس کے علاوہ ٹم ساؤتھی نے 20رنز بنائے۔طاہر نے کیریئر کی اب تک کی سب سے بہترین بولنگ کرتے ہوئے پانچ وکٹ لئے جبکہ ایڈل فیلکھواو نے تین وکٹ لینے میں کامیاب رہے۔کرس مورس کے کھاتے میں دو وکٹ آئے۔طاہر کو میچ کا بہترین کھلاڑی منتخب کیا گیا۔اس سے پہلے، ہاشم آملہ( (62کی تیز نصف سنچری اور کپتان فاف ڈپلیسس( (36اور جین پال ڈیومنی( (29کی سلجھی شاندار اننگز کی مدد سے جنوبی افریقہ نے 20اوورز میں 6وکٹ پر 185رنز بنائے۔نیوزی لینڈ نے ٹاس جیت کر پہلے بولنگ کرنے کا فیصلہ کیا۔جنوبی افریقہ نے اگرچہ خراب شروعات کی۔اس نے 15رن کے مجموعی اسکور پر ہی کوٹن ڈی کوک ((0کا وکٹ گنوا دیا تھا لیکن اس کے بعد آملہ اور کپتان نے ٹیم کو سنبھالا۔ڈپلیسس کا وکٹ 102رنز پر گرا۔انہوں نے 25گیندوں پر ایک چوکا اور تین چھکے لگائے۔آملہ تیسرے وکٹ کے طور پر آؤٹ ہوئے۔آملہ نے اپنی نصف سنچری اننگز میں 43گیندوں کا سامنا کرتے ہوئے نو چوکے اور ایک چھکا لگایا۔ابراہیم ڈی ویلیئرز نے صرف 17گیندوں پر 26رنز بنائے، اس دوران انہوں نے تین چوکے اور ایک چھکا لگایا۔نیوزی لینڈ کی جانب سے ٹرینٹ بولٹ اور کولن گریڈہوم نے دو دو وکٹ حاصل کئے۔