بنگلور، 21جنوری (ایس او نیوز) ریاست کرناٹک کے معروف سوامی اور سدھ گنگا پیٹھ کے سربراہ 111سالہ شیو کمار سوامی جی آج پیر کو  انتقال کرگئے۔ ان کے انتقال پر پوری ریاست میں ماتم چھا گیا اور  وزیر اعلی ایچ ڈی کمارسوامی نے کل منگل کو  سبھی اسکولوں اور کالجوں کے بند کئے جانے کے  ساتھ ساتھ سرکاری طور پر بھی تعطیل کا اعلان کیااور تین دن تک سرکاری سوگ بھی منانے کا اعلان کیا

بتایا گیا ہے کہ سوامی جی کا پھیپھڑوں کے انفیکشن کے علاج کے دوران مٹھ میں دوپہر 11.44 بجے انتقال ہوا۔ سوامی جی کے تعلق سے بتایا جاتاہے کہ وہ "Nadedaduva Devaru" یعنی وہ کرناٹک کے چلتے پھرتے بھگوان تھے۔

شیو کمار سوامی ایک مذہبی پیشوا کے طور پر ریاست بھر میں مشہور تھے، وہ سدگنگا مٹھ ٹمکور کے سربراہ بھی تھے جس کے ماتحت ہزاروں بچوں کو  برسہا برس سے مفت تعلیم دی جارہی ہے، ساتھ ساتھ بچوں کو مفت غذا اور رہائش کا بھی انتظام کیا گیا ہے۔ وہ کئی تعلیمی اداروں کے بانی ہیں جس کے تحت مختلف کورسس سکھائے جاتے ہیں جس میں ماڈرن سائنس اور ٹیکنالوجی کے کورسس بھی شامل ہیں۔ سوامی کے ریاست بھر میں قریب 130 تعلیمی ادارے چل رہے ہیں جس میں بلا تفریق ہر مذہب اور ذات پات کے لوگ تعلیم حاصل کرتے ہیں۔

سوامی جی کی پیدائش یکم اپریل 1908 کو ہوئی تھی، انہوں نے سینٹرل کالج بنگلور سے گریجویشن کیا تھا، ان کو انگریزی ، کنڑا اور سنسکرتی میں عبور حاصل تھا۔

مختلف سماج کے لئے کی گئی ان کی بے لوث خدمات کے اعتراف میں انہیں 1965 میں اعزازی طور پر کرناٹک یونیورسٹی نے ڈاکٹریٹ کی ڈگری سے نوازا تھا۔ جب اُن کی عمر سن 2007 میں سو برس ہوئی تو حکومت کرناٹکا نے انہیں کرناٹک کے سب سے بڑے کرناٹکا رتنا ایوارڈ سے نوازا تھا۔خیال رہے کہ  ان کی خدمات کو دیکھتے ہوئے حکومت کرناٹک سمیت کئی غیر سرکاری اداروں نے انہیں بھارت رتنا ایوارڈ سے نوازنے کا بھی مطالبہ کرچکے ہیں۔

سوامی جی کے تعلق سے بتایا جاتا ہے کہ انہوں نے بلا تفریق مذہب و ملت خدمت خلق کو ترجیح دی تھی، سوامی جی بسوا کے اُصولوں کے تحت فرقہ وارانہ ہم آہنگی پر عمل کرتے تھے، یہی وجہ تھی کہ دنیا بھر میں اُنہیں عزت و احترام کی نگاہ سے دیکھا جاتا تھا۔