شرالی قومی شاہراہ توسیع کا دھرنا تیسرے دن بھی جاری : ضلع انتظامیہ کو شاہراہ تعمیر کا اختیار نہیں : ایڈیشنل ڈی سی
بھٹکل:17؍فروری (ایس او نیوز) شرالی میں گرام پنچایت کی قیادت میں 45میٹر کی توسیع والی شاہراہ تعمیر کو لے کر جاری دھرنے کے تیسرے دن کی دوپہر اترکنڑا ضلع ایڈیشنل ڈی سی ڈاکٹر سریش ہٹنال احتجاجیوں سے ملاقات کرتے نیشنل ہائی وے اتھارٹی آف انڈیا کے حکم کے بنا ضلع انتظامیہ کچھ کرنا ممکن نہیں ہونے کی وضاحت کی۔ گویا 45میٹر کی توسیع کا معاملہ ضلع انتظامیہ کے اختیار میں نہیں ہے بلکہ ہائی وے اتھارٹی ہی حکم دے تو شاہراہ کی تعمیر توسیع کے ساتھ کئے جانے کی با ت کہی۔
احتجاجیوں کی طرف سے رکن اسمبلی سنیل نائک ،گرام پنچایت صدر وینکٹیش نائک، راما موگیر وغیرہ نے اپنی بات رکھتے ہوئے زور دیا کہ شرالی میں 45میٹر کی توسیع والی شاہراہ کی ضرورت ہے۔ اس سے پہلے افسران نے ہمیں کئی مرتبہ بھروسہ دے کر دھوکہ دیا ہے۔ ہمارے مطالبات پورے ہونے تک دھرنا جاری رہے گا، اس سلسلے میں مناسب آرڈر ہونے تک جاری کاموں کو عارضی طورپر روکنے پر زور دیا۔
احتجاجیوں کی شکایات سماعت کرنےکے بعد ایڈیشنل ڈی سی ہٹنال نے کہاکہ قومی شاہراہ تعمیر کا پورا کام مرکزی حکومت اور نیشنل ہائی وے اتھارٹی کے اختیار میں ہے ، ضلع انتظامیہ نے 45میٹر کی توسیع والی شاہراہ کے لئے پیش کش ارسال کی ہے، اگر وہاں سے 45میٹر کی شاہراہ تعمیر کا حکم نامہ آتاہے تو اس کو نافذ کیاجائے گا ، مگر ابھی تک کوئی آرڈر نہیں آیاہے، نیشنل ہائی وے نے شرالی میں شاہراہ کی توسیع 30میٹر تک طئے کی ہے اسی پیمائش سے کام کو جاری رکھنا ہے ، مرکزی حکومت کی طرف سے وزیر اعظم کی موجودگی میں ہرہفتہ شاہراہ تعمیر ترقی جات کاموں کا جائزہ میٹنگ ہوتی ہے، ہم کسی حال میں بھی جاری کام کو روک نہیں سکتے ، کام کو روکنے کے لئے وہیں سے آرڈر ملنا ضروری ہے۔ آپ نے جومیمورنڈم دیا ہے اس کو حکومت کے چیف سکریٹری تک پہنچایا جائے گا۔ شرالی علاقے کے 700میٹر کی حدود میں 48عمارتوں کے زمین کی حصولیابی کرنی ہے، زمین مالکان کی منظوری لے کر ان کے دستخط کے ساتھ عرضی لاتے ہیں تو حکومت کو روانہ کرتے ہوئے مرکزی وزیر اور دیگر عوامی نمائندوں کے تعاون سے 45میٹر کی توسیع کے لئے ہائی وے اتھارٹی کو اپیل دینے کی بات کہی۔ اس کے بعد شرالی گرام پنچایت دفتر میں ایڈیشنل ڈی سی ڈاکٹر ہٹنال ، پنچایت کے نمائندوں کے ساتھ عوامی میٹنگ کا انعقاد ہوا۔ بھٹکل اسسٹنٹ کمشنر ساجد ملا، تحصیلدار وی این باڈکر ، سی پی آئی کے ایل گنیش موجود تھے۔