سرسی/بھٹکل:13/ستمبر (ایس اؤنیوز)میانمار میں روہنگیا مسلمانوں کی حفاظت ، انصاف اور امن کا مطالبہ لےکر بھٹکل اور سرسی میں سوشیل ڈیموکرٹیک پارٹی آف انڈیا کے کارکنوں نے احتجاجی ریلی کا اہتمام کرتے ہوئے مقامی تحصیلدار اور اسسٹنٹ کمشنر کے توسط سے اقوام متحدہ (یو این اؤ) کو میمورنڈم سونپا ۔

میمورنڈم میں کہا گیا ہے کہ میانمار میں نہتے معصوم مسلمانوں پر وہاں کے بدھسٹوں کی حکومت غیر انسانی سلوک کرتےہوئے ظلم وبربریت کا رویہ اپنائے ہوئے ہے، انہیں اپنے ملک سے باہر نکال کر بین الاقوامی حقوق انسانی کی خلاف ورزی کررہی ہے۔ روہنگیا کے لوگ بھی انسان ہیں ، ان کی قتل وغارت گری اور ظلم کو ختم کرنا چاہئے، اس سلسلے میں یواین اؤ مداخلت کرتے ہوئے وہاں امن کو قائم کرنے کامطالبہ کیاگیا ہے۔ ترکی صدر رجب طیب ایرودآن کی ستائش کرتےہوئے ایس ڈی پی آئی نے حکومت ہند پر بھی زور دیا ہے کہ سفارتی طورپر مداخلت کرتے ہوئے میانمار کے انسانوں کے مسائل کو حل نکالے۔

سرسی میں مقامی شاخ کی طرف سے 500سے زائد کارکنان نے احتجاجی مظاہرے کے ذریعے شہر کے اہم سڑکوں سے گزر کرتحصیلدار کے توسط سے یواین اؤ کو میمورنڈم سونپا اور وہاں تعلقہ صدر محمد اسلم اور محمد محسن نے خطاب کیا ۔اسی طرح بھٹکل میں بھی ذمہ داروں نے اے سی دفتر کے سامنے جمع ہوکر اپنی بات رکھی اور اقوام متحدہ کو میمورنڈم ارسال کیا۔ اس موقع پر بھٹکل کے ایس ڈی پی آئی کے ذمہ داران ظہیر احمد شیخ، محمد یوسف ملا، سرفراز خان، عظیم وغیرہ موجود تھے۔