خاندان او ر سماج والوں سے تعاون نہ ملنے پرہندو خاتون کی آخری رسومات پی ایف آئی اور ایس ڈی پی آئی نے انجام دی
بنٹوال5؍ستمبر (ایس او نیوز) کافی عرصے سے علیل رہنے والی ایک ہند و خاتون کی جب موت واقع ہوئی تو اس کے خاندان اور سماج والوں نے اس کی آخرت رسومات میں شامل ہونے انکار کردیا جس کے بعدپی ایف آئی اور ایس ڈی پی آئی نے آگے بڑھ کر لاش کی آخری رسومات کا انتظام کیا ۔
تاخیر سے موصولہ رپورٹ کے مطابق یہ واقعہ کوچی گوڈے اڈور نامی علاقے میں پیش آیا، جہاں سوشیلمّا (65سال) کا سنیچرکے دن شام میں 4بجے انتقال ہوا تھا۔ گھر والوں نے رشتے داروں اور سماج کے لوگوں کو اس کی اطلاع دی۔ لیکن چونکہ سوشیلمّا نے اپنی ایک بیٹی کی شادی دوسری قوم کے لڑکے کے ساتھ کردی تھی اس لئے اس کے خاندان یا سماج والوں نے اس سے دوری اختیار کی اور اس کی آخری رسومات میں تعاون کرنے پر آمادہ نہیں ہوئے۔رات ۹ بجے تک لاش اسی طرح گھر میں پڑی رہی۔
اس واقعے کی خبر جب پی ایف آئی اور ایس ڈی پی آئی کے ذمہ داروں کو ملی تو انہوں نے آگے بڑھ کر یہ ذمہ داری سنبھالی۔اور اپنے خرچ پر ایمبولینس میں لاش کو بڈکبیل شمشان لے جاکررات کے تقریباً ایک بجے اس کی آخری رسومات انجام دیتے ہوئے انسانیت اور مروت کی ایک مثال قائم کی۔
ایس ڈی پی آئی کے ژونل صدر اے کے مصطفی، پی ایف آئی کے ژونل صدر اشرف ناڈوگُدّے، ژونل کمیٹی کے اراکین ضیاء الدین پانڈیل، حکیم پانڈیل، شفیق گوڈے، ستار، عمران وغیرہ نے اس کام میں بڑھ چڑھ کر حصہ لیا۔ عوام کی طرف سے ان کی انسانیت نوازی کے لئے ستائش کی جارہی ہے۔