وی ایچ پی لیڈر جگدیش شینوا کو گرفتار کرنے ایس ڈی پی آئی کا مطالبہ
منگلورو 29؍جنوری (ایس او نیوز) عبدالبشیر قتل کے سلسلے میں وشوا ہندو پریشد کے لیڈر جگدیش شینوانے جو بیان دیا ہے اسے قانون اور دستور ہند کی بالادستی کو چیلنج کرنے والا اور اشتعال انگیز بیان قرار دیتے ہوئے سوشیل ڈیموکریٹک پارٹی آف انڈیا (ایس ڈی پی آئی) نے جگدیش کو گرفتار کرنے کا مطالبہ کیا ہے۔
یاد رہے کہ ایک پروگرام میں تقریرکرتے ہوئے جگدیش شینوا نے کہا تھا کہ دیپک راؤ کے قتل کا بدلہ لینے کے لئے بشیر کو قتل کیا گیا ہے۔ اس لئے بشیر کے قتل پر وشوا ہندوپریشد کو فکریا افسوس کرنے کی ضرورت نہیں ہے۔ بلکہ جو گروہ اس طرح کی کارروائیاں انجام دے رہا ہے انہیں تحفظ فراہم کیا جانا چاہیے۔ جگدیش نے یہ بھی کہا تھا کہ اس تعلق سے اس پر قانونی کارروائی ہوگی تب بھی اسے کوئی فرق نہیں پڑے گا۔
ایس ڈی پی آئی جنوبی کینرا کمیٹی نے اس بیان کی مذمت کرتے ہوئے کہاہے کہ یہ قاتلوں کی حمایت کرنے والا بیان ہے۔اور دیپک راؤ قتل میں بی جے پی کا ہاتھ ہونے کی جو تحقیقات ہورہی ہے اس کا رخ بدلنے کے لئے ایسی بات کہی گئی ہے۔ اس کے علاوہ اس بیان سے بشیر کے قتل میں جگدیش شینوا کا ہاتھ ہونے کے بھی اشارے مل رہے ہیں۔
چونکہ یہ جذبات کو مشتعل کرکے فرقہ وارانہ فساد پھیلانے کی ساز ش کا حصہ ہے،لہٰذا ایس ڈی پی آئی کے ضلعی صدر حنیف خان کوڈاجی نے اپنے اخباری بیان میں مطالبہ کیا ہے کہ جگدیش پر کیس داخل کرتے ہوئے اسے گرفتار کیا جائے اور اس معاملے کی پوری طرح چھان بین کی جائے۔