بھٹکل:30/مئی (ایس اؤ نیوز )روٹری کلب بھٹکل کے  اہتمام یہاں بندرروڈ پرواقع نیو انگلش اسکول میں بھٹکل کی خواتین کے لئے  پیشہ وارانہ تربیتی کیمپ کا انعقاد کیا گیا ہے ، جہاں  خواتین کو سلائی سکھانے کے ساتھ کمپوٹر کلاس کے ذریعے اُنہیں کمپوٹر کے نت نئے پروگرام سے متعارف کرایاجائے گا، اس کیمپ میں پاپڑ و  دیگر بیکری فوڈ س  بنانے کی ٹریننگ بھی دی جائے گی۔ اس ضمن میں اسکول میں تین الگ الگ کمرے مختص کئے گئے ہیں، جبکہ ایک انکوائری کائونٹر بھی رکھا گیاہے، جہاں رابطہ کرتے ہوئے کوئی بھی خاتون ان پیشہ وارانہ کورسس میں داخلہ لے سکتی ہیں۔

تربیتی کیمپ کا افتتاح 29/مئی بروز پیر کو روٹری کلب کے  ضلعی  گورنر وجئے کمار پائی رائیکر کے ہاتھوں کیا گیا، جنہوں نے  خطاب کرتے ہوئے کہاکہ اس طرح کے پیشہ ورانہ تربیتی کیمپوں کے انعقاد سے خواتین ، خود کار روزگار حاصل کرسکیں گی۔ انہوں نے خواتین سے اپیل کی کہ وہ ان کورسس سے فائدہ اُٹھائیں۔ انہوں نے  بتایا کہ اس طرح کے تربیتی کیمپ میں تیار کردہ اشیاء کی فروخت کاری سے کلب کو بھی منافع ہوگا اور ایک نئی چیز بازار میں متعارف ہوگی۔

بھٹکل ایجوکیشن سوسائٹی بھٹکل جس کے ماتحت نیو انگلش اسکول چلایاجاتا ہے،  کے صدر سریش نایک نے خطاب کرتے ہوئے کہاکہ اگرکوئی چیز کسی کو مفت میں تقسیم کریں گے تو اس کے متعلق جذبات کچھ اور ہی ہوتے ہیں لیکن کلب نے یہ کام بہت اچھا کیا کہ تربیتی کیمپ کے ذریعے اشیاء کی تیار ی اور بازار میں فروخت کاری کا کام شروع کیا ہے جس سے نئی راہیں کھلیں گی۔ اسی طرح انہوں نے بتایا کہ ہمارا  اپنا تعلیمی ادارہ گذشتہ کئی سالوں سے شہر کے بچے اور بچیوں کو تعلیم کی روشنی فراہم کرنے  میں مصروف ہے فی الحال ہمارے تعلیمی ادارے میں 3000طلبا زیر تعلیم ہیں۔

اعزازی مہمان روٹرین پرکاش اور مہیلا سنگھا کی سوماوتی شٹی نے بھی خطاب کرتےہوئے روٹری کلب کے سماجی خدمات کی ستائش کی۔ روٹر ی کلب کے صدر ڈاکٹر مشتاق احمد بھاوی کٹی نے استقبال کیا تو ڈاکٹر گوریش پڈوکونے نے مہمانوں کا تعارف پیش کرنے کے ساتھ پروگرام  کی  نظامت کی۔ روٹرین ذیشان احمد نے میمونٹو پیش کیا۔ سکریٹری شاکر حسین نے شکریہ اداکیا۔ روٹرین راجیش نایک، پرشانت کامت، نذیرقاسمجی، ایس ایم خان، روی نمبیار، انصار کولا، جلال الدین کاسرگوڈ، عبدالرحمن صدیقی،  راگھویندر نائک سمیت کئی ممبران موجود تھے۔

پروگرام کے بعد اخبارنویسوں کو معلومات فراہم کرتے ہوئے روٹری کلب کے سکریٹری شاکر حُسین نے بتایا کہ سلائی کے لئے 15 دن سے 20 دن کا کورس ہوگا، کمپوٹر کے لئے دو ماہ سے تین ماہ کا کورس ہوگا۔فوڈ پروسس کا کورس بھی تین ماہ سے زیادہ کا نہیں ہوگا۔ انہوں نے بتایا کہ جو بھی خواتین ان کورسوں سے استفادہ کرنی چاہتی ہیں، وہ سیدھے نیو انگلش اسکول پہنچ کر متعلقہ  کائونٹر پر جاکر اپنا نام درج کرواسکتی ہیں۔ فیس کے متعلق انہوں نے بتایا کہ   بالکل معمولی فیس لی جائے گی۔

 معروف سماجی کارکن اور روٹرین نذیر قاسمجی نے بتایا کہ ان کورسوں کے کامیاب انعقاد کے لئے  34 لاکھ روپئے منظور کئے گئے ہیں۔ انہوں نے  بھٹکل کی بالخصوص بے روزگار خواتین سے اپیل کی کہ وہ ان کورسوں میں داخلہ لیتے ہوئے خودکار روزگار حاصل کریں۔ انہوں نے کہا کہ ٹریننگ حاصل کرنے کے بعد خواتین گھر بیٹھیں کپڑوں کی سلائی کرسکتی ہیں ۔  بیکری ایٹمس بناکر بازار میں فروخت  کرسکتی ہیں، کمپوٹر میں بھی مہارت حاصل کرکے گھر بیٹھے کام کرسکتی ہیں۔