مینگلور کے قریب منجیشور کے ایک مکان سے لاکھوں روپے مالیت کی چوری؛ گھر پر لوگ سوتے ہی رہ گئے اور لٹیروں نے گھر صاف کردیا
مینگلور 18؍اگست ( ایس او نیوز) پڑوسی ریاست کیرالہ کے کنجتّور پداو نامی مقام پر لُٹیروں نے ایک مکان میں گھس کر پورا گھر صاف کردیا اور گھر والے گہری نیند میں سوتے ہی رہ گئے۔ صبح نیند سے اُٹھے تو گھر صاف ہوچکا تھا۔
ذراِئع سے ملی اطلاع کے مطابق دودھ کے بیوپاری منیر ، اس کی بیوی اور ان کے تین بچے گہری نیند سورہے تھے۔ چوروں نے پہلے سامنے کے دروازے کا ہینڈل باہر سے رسی کی مدد سے کھمبے کے ساتھ باندھ دیا تاکہ اندر والے لوگ دروازہ کھول نہ سکیں۔پھر پچھلے دروازے کو توڑتے ہوئے گھر میں داخل ہوئے اور اسی کمرے میں سونے کے زیورات اور نقد رقم پر ہاتھ صاف کیا جس میں منیر کی بیوی اور بچے سوئے ہوئے تھے۔چوری کا معاملہ اس وقت سامنے آیا جب دوسرے کمرے میں اپنے بیٹے کے ساتھ سویا ہوامنیر حسب معمول دودھ کے کاروبار پر جانے کے لئے جاگ اٹھا تو حسینہ کے کمرے میں موجود الماری کا سامان بکھرا ہوا تھا۔
منیر کی طرف سے پولیس میں درج کی گئی شکایت کے مطابق چوری کی یہ واردات رات ۲ اور ۳ بجے کے وقت انجام دی گئی ہے جس میں تقریباً 17لاکھ روپے کے زیورات، 70ہزار روپے نقداور قیمتی راڈو دستی گھڑی کی چوری ہوئی ہے۔پولیس کے اعلیٰ افسران نے موقع پر پہنچ کر جائزہ لیا اور معاملہ درج کرکے تحقیقات کا آغاز کیا ہے۔
