بھٹکل30؍مئی (ایس او نیوز) زندگی میں بہت سے لوگ کسی کے یہاں ملازمت کرنے کے بجائے چھوٹا موٹا ہی سہی اپنا خود کا روزگار شروع کرنا چاہتے ہیں۔ لیکن صحیح تربیت اور معلومات کی کمی کی وجہ سے ان کے لئے یہ کام آسان نہیں ہوتا۔ لیکن جہاں انسان پورے ذوق و شوق کے ساتھ کسی خاص میدان میں پوری محنت کے ساتھ قسمت آزمائی کرنا چاہتا ہے تو اکثر اس کے لئے کامیابی کے دروازے کھل جاتے ہیں۔

ایک ایسی ہی مثال قائم کی ہے بھٹکل  کے جناب رضوان گنگاولی نے جو کہ پیشے سے ایک صحافی ہونے کے باوجود اپنی آمدنی بڑھانے کے لئے گزشتہ 30برسوں سے نہ صرف خرگوش پالن (ریابٹ بریڈنگ) کا مرکز چلارہے ہیں بلکہ اس میدان میں دلچسپی رکھنے والوں کو تربیت اور رہنمائی بھی فراہم کر رہے ہیں۔آج وہ صرف ریاست کرناٹکا کے لئے نہیں بلکہ دیگر ریاست سے آنے والے خرگوش پالن کے شوقین اور اس کاروبار سے منسلک ہونے کے خواہش مندوں کے لئے سب سے کامیاب تربیت کار کی حیثیت سے پہچانے جاتے ہیں۔موسیٰ نگر میں واقع ان کا ’کراولی ریابِٹ بریڈر‘نامی خرگوش پالن کا مرکز ان کی اپنی ذاتی آمدنی کا اضافی ذریعہ ہونے کے ساتھ ساتھ خرگوش کی بریڈنگ کے ذریعے اپنا روزگار شروع کرنے والوں کے لئے ایک نئے اقدام اور نئی منزل کی راہ دکھانے کا بھی مرکز بن گیا ہے۔

رضوان گنگاولی کا کہنا ہے کہ صرف شوق پورا کرنے کے لئے انٹرنیٹ پر موجود ویڈیو کلپس دیکھ کر خرگوش پالنے کی کوشش کرنا بیکار ہے بلکہ یہ ایک گھاٹے کا سودا بن سکتا ہے۔ لیکن اگر کوئی اس کی صحیح تربیت لے۔ سنٹر کی دیکھ ریکھ اور صفائی ستھرائی کا پورا دھیان رکھے۔ خرگوشوں کو چھوٹے بچوں سے زیادہ نازکی کے ساتھ سنبھالنے اور ان کی پرورش کرنے میں مشغول ہوجائے تو اس سے کافی منافع کمایا جاسکتا ہے۔اور اس کاروبار کو بڑے پیمانے پر بھی چلایا جاسکتا ہے۔

رضوان گنگاولی نے اس فیلڈ میں بڑی مہارت حاصل کرلی ہے۔ وہ صبح سویرے اٹھ کر اپنی صحافت کی ذمہ داریوں میں مصروف ہونے سے پہلے اپنے فارم پر جاتے ہیں اور خرگوشوں کی صفائی ،انہیں غذا اور دوا فراہم کرنے کے ساتھ فارم کے احاطے کی صفائی وغیرہ پر پوری تندہی اور د ل جمعی کے ساتھ وقت گزارتے ہیں۔ خرگوشوں کے لئے مناسب غذا اور ان کی خاص بیماریوں کی دوا کے بارے میں انہیں پوری جانکاری ہے۔ اس لئے ان کا یہ بزنس اب ایک بہت ہی منافع بخش مرحلے میں پہنچ چکا ہے۔

گزشتہ ایک سال سے ہر اتوار کے دن صبح دس بجے سے دوپہر تین بجے تک رضوان گنگاولی کے فارم پرخرگوش پالن کا کاروبار اپنانے والوں کے لئے  تربیتی کیمپ ہو اکرتا ہے۔ جملہ تین کیمپ ہوتے ہیں جن میں 15-20افراد کا ایک بیاچ ہوتا ہے۔ دو بیاچ صرف ریاست کرناٹکا کے رہنے والوں کے لئے مخصوص ہوتے ہیں اور ایک بیاچ دوسری ریاست سے آنے والے افراد کے لئے ہوتاہے۔ ان سے تربیت پانے والے بہت سارے افراد ملک کی مختلف ریاستوں میں خرگوش پالن کاروبار سے جڑ گئے ہیں۔اورریاست و بیرون ریاست سے فون کے ذریعے یہ لوگ ان سے براہ راست رابطے میں رہتے ہیں۔ اس کے علاوہ ملک کے مختلف مقامات سے خرگوش پالن کے سلسلے میں لوگ ٹیلی فون پربھی مسلسل ان سے جانکاری حاصل کیا کرتے ہیں۔

سچ کہیں تو رضوان گنگاولی نے خاموشی کے ساتھ اتنے برسوں سے ایک مخصوص کاروبار میں اپناجو سکہ جمایا ہے، وہ نوجوانوں کے لئے اور خاص کرخود کا کاروبار شروع کرنے کا منصوبہ رکھنے والوں کے لئے مشعل راہ ہے۔ رضوان گنگائولی سے موبائل نمبر 9035535702 پر رابطہ کیا جاسکتا ہے۔