پتور: 2بچوں کی ماں نے کیا شوہر کو چھوڑ کر پڑوسی نوجوان کو اپنانے کا فیصلہ
پتور 28؍نومبر(ایس او نیوز) اپن انگڈی پولیس اسٹیشن کی حدود میں آنے والے ایک گاؤں میں 2بچوں کی ماں اپنی 9سالہ شادی شدہ زندگی کو برباد کرنے اور شوہر کو چھوڑ کر پڑوسی نوجوان کے ساتھ زندگی گزارنے کی ضد پر اَڑ گئی ہے، جس کی وجہ سے جھگڑے اور پولیس کی مداخلت تک نوبت آگئی ہے مگر مسئلہ حل نہیں ہوپایا ہے۔
موصولہ رپورٹ کے مطابق مذکورہ خاتون کا شوہر اوریہ پڑوسی نوجوان آپس میں دوست تھے اور شوہر نے خود اپنے اس نوجوان دوست کو یہ ذمہ داری دے رکھی تھی کہ جب وہ اپنے کام دھندے کے سلسلے میں گاوں سے باہر رہے تو گھر کا سوداسلف لاکر دے۔ اسی بہانے نوجوان کا گھر پر آنا جانا مذکورہ خاتون اور اس کے بیچ عشق کا سبب بن گیا جو آج دیوانگی کی حد کو چھو گیا ہے۔
بتایا جاتا ہے کہ جب عورت نے شوہر کا ساتھ چھوڑنے اور پڑوسی نوجوان کو اپنانے کی بات کھل کر سامنے رکھ دی تو ان کاآپس میں جھگڑ ا ہوگیا۔ شوہر نے اس نوجوان سے بھی جھگڑنے کے بعداس کے خلاف پولیس اسٹیشن میں شکایت درج کروادی۔ پولیس نے نوجوان کو طلب کرکے اس خاتون سے دور رہنے کی تنبیہ اور تاکید کی۔ لیکن اسی رات کو خاتون نے نوجوان کو فون کرکے دھمکی دی کہ اگر وہ اس سے دور ہوگیا تو پھر وہ خودکشی کرلے گی۔ اس پر نوجوان نے پولیس اسٹیشن پہنچ کر ماجرا سنایا تو پولیس نے خاتون او راس کے شوہر کو بھی پولیس اسٹیشن طلب کرکے معاملہ سلجھانے کی کوشش کی، لیکن وہ خاتون شوہر کو چھوڑکر نوجوان کے ساتھ ہی رہنے کی ضد پر اڑی رہی اور وہاں بھی دھمکیاں دینے لگی کہ اگر اسے شوہر کے ساتھ جانے پر مجبور کیاگیا تو وہ خود کشی کرلے گی۔ کہتے ہیں کہ اس صورتحال سے پریشان پولیس افسران نے اس خاتون کے بھائی کو طلب کیا اوریہ ہدایت دیتے ہوئے اس کے ساتھ مائیکے بھیج دیا کہ اگر خاتون اپنی ضد چھوڑ کر شوہر کے ساتھ ہی رہنے کا من بنالیتی ہے تو پھر اسے شوہر کے گھر لاکر چھوڑنا۔اس کا نتیجہ یہ ہوا ہے کہ ایک طرف دو بچے اور شوہر بے بسی اور شرمندگی کا سامنا کررہے ہیں تو دوسری طرف پڑوسی نوجوان ہے جس کے لئے دو بچوں کی ماں کو اپنا نا بھی مشکل اور چھوڑنا بھی ناممکن ہوگیا ہے۔