ترووندپورم20اگست (ایس او نیوز؍ آئی این ایس انڈیا )کیرالہ میں سیلاب سے مچی تباہی کی وجہ سے امدادی کیمپوں میں مقیم متاثرین کی مدد کے لئے یہاں سنٹرل جیل کے قیدی بھی اپنی خدمات پیش کررہے ہیں اور ان کے لئے روٹیاں بنا رہے ہیں۔
8 اگست سے سیلاب میں اب تک 400 لوگوں کی جان گئی ہے اور سات لاکھ سے زیادہ لوگ بے گھر ہوئے ہیں۔ یہاں پوجپپورہ کی سینٹرل جیل میں کچھ سالوں سے کاروباری مقاصد سے چپاتی، سبزیوں اور چکن کری جیسی کئی اشیاء خوردنی ’فریڈم‘ نام کے برانڈ سے بیچی جا رہی ہیں۔
جیل حکام کے مطابق گزشتہ ہفتے سیلاب متاثرین کے لئے اوسط 40 سے 50 ہزار چپاتی بنائی گئیں۔ تقریبا 50 قیدیوں کی ٹیم مختلف شفٹ میں دن رات چپاتی بنانے کے کام میں لگی ہوئی ہے ۔ چپاتی اور سبزیوں کے پیکٹ ضلع کے حکام کو سونپے گئے ہیں۔ انہیں ریلیف کیمپوں میں تقسیم کیا جانا ہے۔
جیل کے ایک سینئر افسر نے بتایا کہ ہمارے کھانے کے پیکٹ بنیادی طور پر چھتوں اور علاحدہ بنی عمارتوں میں پھنسے لوگوں کو ہوائی راستے سے پہنچانے کے لیے ہیں۔کیرالہ میں سیلاب سے تباہی مچی ہوئی ہے۔ اب تک 400 سے زیادہ لوگوں کی موت ہو چکی ہے۔
سیلاب کی وجہ سے تقریبا 10 لاکھ لوگوں کو اپنا گھر بار چھوڑ کر ریلیف کیمپوں میں پناہ لینی پڑی ہے۔ سیلاب زدگان کے لئے 5،645 ریلیف کیمپ بنائے گئے ہیں۔ ان لوگوں کی مدد کے لئے مرکزی حکومت سے لے کر ریاستی حکومتوں تک اور بالی وڈ سے لے کر عام لوگوں تک ہر کوئی سامنے آ رہا ہے۔ جہاں بالی وڈ ستارے ان لوگوں کے لئے لاکھوں کروڑوں عطیہ کر رہے ہیں تو وہیں عام لوگ بھی اپنے اپنے حساب سے ڈونیٹ کر رہے ہیں۔