پتور میں سنگھ پریوار کی طرف سے فرقہ وارانہ فساد برپا کرنے کی سازش کے خلاف پاپولر فرنٹ کی پولیس میں شکایت
مینگلور 8؍دسمبر (ایس او نیوز) ایک پریس کانفرنس کے دوران ڈاکٹر کے ایم پرساد کی طرف سے پتور میں فرقہ وارانہ فساد برپا ہونے کی دھمکی دینے کے خلاف پاپولر فرنٹ آٖف انڈیا (پی ایف آئی) نے اسے سنگھ پریوار کی ایک سازش قرار دیتے ہوئے پولیس میں شکایت درج کروائی ہے۔
ڈاکٹر پرساد نے کچھ دن پہلے ایک بزرگ خاتون کو ٹکر مارنے والی کار کے ڈرائیور کی پیٹائی کے پس منظر میں ایسا اشتعال انگیز بیان دیا تھا۔ انہوں نے دھمکی دیتے ہوئے کہا تھا کہ اس طرح کا واقعہ دوبارہ ہواتو پھر ان کے نوجوان خاموش نہیں بیٹھیں گے اور اس صورت میں ہونے والے فرقہ وارانہ فساد کے لئے پولیس ذمہ دار ہوگی۔
پاپولر فرنٹ آف انڈیا کے ذمہ داران نے ڈاکٹر پرساد کے علاوہ اس پریس کانفرنس میں موجودارون کمارپُتّیل، نوین پڈنور، متھن اور چینمئی رائے وغیرہ کو اس سازش کا حصہ قرار دیتے ہوئے تمام پانچوں افراد پرٹاؤن پولیس اسٹیشن میں کیس داخل کیا ہے۔