بھٹکل میں تیر ہبّا کے پس منظر میں پیس میٹنگ کا انعقاد
بھٹکل 21؍مارچ (ایس اونیوز) بھٹکل میں25مارچ کو ہونے والے تیر ہبّا (رتھ اتسوا) کے پس منظر میں اسسٹنٹ کمشنرمنجو ناتھ کی صدارت میں مختلف مذاہب کے نمائندوں کے ساتھ ایک پیس میٹنگ کا انعقاد کیا گیا۔
ٹورسٹ بنگلو میں منعقدہ اس میٹنگ سے خطاب کرتے ہوئے اے سی منجوناتھ نے کہا کہ تمام مذاہب والوں کی بھائی چارگی کی وجہ سے اب بھٹکل حساس علاقہ نہیں رہا ہے۔بھٹکل کا رتھ اتسوا اس علاقے کا بہت ہی مشہور تہوار ہے ۔ اس تہوار کو خوش اسلوبی سے انجام تک پہنچانے میں مختلف سرکاری محکمہ جات کو اپنے فرائض نہایت ذمہ داری کے ساتھ اداکرنے ہونگے۔ڈی وائی ایس پی ویلنٹائن ڈیسوزا نے کہاکہ اس رتھ اتسوا میں 20تا25ہزار افراد کی شرکت متوقع ہے۔امن و امان اور تحفظ کی فراہمی کے لئے عوام کی طرف سے پورا تعاون ملنا چاہیے۔
اس موقع پر بھٹکل ٹی ایم سی کے صدر جناب صادق مٹا، اسارکیری مندر انتظامیہ کے صدر ایم آر نائک، مجلس اصلاح و تنظیم کے جنرل سکریٹری الطاف کھروری، نائب صدر تنظیم عنایت اللہ شاہ بندری، سری دھر نائک، ڈی بی نائک وغیرہ نے اپنے خیالات کا اظہار کیا۔تحصیلدار وی این باڈکر،سی پی آئی گنیش، ہنومنتھ مندر انتظامیہ کے صدرشری دھر موگیر وغیرہ اسٹیج پر موجود تھے۔