بھٹکل میں سنیل نائک کی جیت پر بی جے پی ورکروں اور لیڈروں کا شکریہ ادا کرنے خصوصی پروگرام
بھٹکل 22/مئی (ایس او نیوز) بھٹکل میں بی جے پی لیڈروں اور ورکروں کی کوششوں سے نوجوان چہرہ اور پہلی بار کسی انتخابات میں حصہ لینے والے سنیل نائک کی اسمبلی انتخابات میں شاندار جیت ہوئی ہے، ان کی جیت میں اہم رول ادا کرنے والوں کا شکریہ ادا کرنے ایک اہم پروگرام یہاں کے ایک پروگرام ہال میں منعقد کیا گیا جس میں سابق وزیرشیوانند نائک، ضلعی بی جے پی صدر کے جے نائک، بی جے پی لیڈرس کرشنا نائک اورونود پربھوسمیت کافی لیڈران اور ممبران نے حصہ لیا۔
ورکروں سے خطاب کرتے ہوئے ایک طرف نو منتخب ایم ایل اے سنیل نائک نے سبھوں کا فرداً فرداً شکریہ ادا کیا، وہیں الگ الگ لیڈران نے سنیل نائک کو پھولوں کی مالا پہناتے ہوئے اُن کی بھرپور تہنیت کی ۔سنیل نائک نے اپنے تاثرات پیش کرتے ہوئے بھٹکل کے نوجوانوں کا بھرپور شکریہ ادا کیا جن کی بھاگ دوڑ سے ہی وہ کامیاب ہوئے ہیں، اسی طرح انہوں نے اپنی جیت کا کریڈٹ ایم پی آننت کمار ہیگڈے کو دیا، جن کی کوششوں اور گائیڈلائنس سے ہی وہ کامیاب ہوپائے ہیں، ساتھ ساتھ انہوں نے دیگر لیڈران کا بھی نام لے کر شکریہ ادا کیا۔انہوں نے اس بات کا اعادہ کیا کہ وہ بھٹکل اسمبلی حلقہ کے عوام کے مسائل کو حل کرنے کی طرف بھرپور توجہ دیں گے اور حلقہ میں ترقیاتی کاموں کو انجام دیں گے انہوں نے اس بات کی اُمید ظاہر کی کہ آئندہ بھی اُنہیں تمام لوگوں کاتعائون حاصل رہے گا۔
پروگرام میں خطاب کرتے ہوئے آسارکیری کے کرشنا نائک نے بتایا کہ ریاست میں بی جے پی ایک بڑی پارٹی بن کر اُبھرنے کے بائوجود بی جے پی کو اقتدار نہیں ملا، مگر ہمیں فکر کرنے کی ضرورت نہیں ہے، جے ڈی ایس اور کانگریس کے گٹھ بندھن سے جو سرکار قائم ہوئی ہے ہمیں پورا یقین ہے کہ یہ حکومت چھ ماہ سے زیادہ چلنے والی نہیں ہے۔ انہوں نے کہا کہ آج سبھی طاقتیں مودی کو اقتدار سے ہٹانے اور اُنہیں اقتدار سے باہر کرنے کے لئے متحد ہورہے ہیں ہمیں بھی اپنے طور پر کوشش کرکے مودی حکومت کو بحال کرنے ہرممکن کام کرنا ہوگا اور بی جے پی کی کامیابی کے لئے سبھی لوگوں کو متحد ہونا ہوگا۔
شیوانند نائک سمیت دیگر لیڈران نے بھی اس موقع پر اپنے اپنے خیالات کا اظہار کیا ۔بھٹکل بی جے پی صدر راجیش نائک نے صدارت کی۔