پتور21؍اپریل (ایس او نیوز) شادی کی تقریب میں رونما ہونے والے ایک المناک واقعہ میں دلہن کی ماں اس وقت موت کا شکار ہوگئی جب دلہن کا ہاتھ دولھے کے ہاتھ میں دیا جانے والاتھا۔

ذرائع نے بتایا کہ یہاں سے قریب اپن انگڈی میں واقع ایک شادی ہال میں ویرجا (۴۰سال) کی اکلوتی بیٹی کی شادی کی رسم انجام دی جارہی تھی۔ ویرجا تمام رسموں میں بڑھ چڑھ کر دلچسپی لے رہی تھی۔لیکن جب دلہن کو دولھے کے ہاتھ سونپنے کی آخری رسم شروع ہوئی تواچانک اس کے سینے میں شدید درد اٹھا اور وہ بے ہوش ہو کر گرگئی ۔ اسے فوری طور پر قریبی اسپتال میں داخل کیا گیا مگر وہ جانبر نہ ہوسکی۔

موصولہ اطلاع کے مطابق ویرجا کا خاندان غربت و افلاس کا مارا ہے۔ ویرجا کو دل کی بیماری تھی اور اس کا ایک آپریشن بھی ہوچکا تھا، لیکن ڈاکٹروں کے مشورے کے مطابق دوسرا آپریشن وہ مالی تنگی کی وجہ سے نہیں کرواسکی تھی۔اس کا شوہر معذور ہے اور قلی مزدوری کرکے گھر خرچ چلایا کرتا ہے۔جبکہ دو لڑکوں میں سے ایک نے کمائی میں والد کا ہاتھ بٹانے کے لئے اسکول کی تعلیم چھوڑ کر خود بھی قلی مزدوری کا پیشہ اپنایا ہواہے۔غربت کی ماری ویرجا نے بڑے ارمانوں سے اپنی اکلوتی لاڈلی بیٹی کو نئی زندگی کی طرف قدم بڑھاتے ہوئے دیکھا اور خود دنیا سے منھ موڑ کر چلتی بنی، جس سے خوشی و شادمانی کی محفل پل بھر میں ماتم کدہ بن گئی۔