بنگلورو،25؍مارچ (ایس او نیوز) مرکزی وزیر ڈی وی سداننداگوڑا نے الزام لگایا ہے کہ انتخابات کے لئے سرمایہ توقع کے مطابق جمع نہ ہونے کی وجہ سے کانگریس ۔ جنتادل (یس) مخلوط حکومت نے اولا ٹیکسی خدمات پر6؍ماہ کے لئے پابندی عائد کی تھی۔ ایک نجی ہوٹل میں اخباری کانفرنس سے خطاب کرتے ہوئے سداننداگوڑا نے یہ الزام عائد کیا اور کہاکہ اولا ٹیکسی خدمات پر پابندی عائد کرنے کے پیچھے حکومت کی جانب سے انتخابی اخراجات کے لئے سرمایہ اکٹھا کرنے کا مقصد واضح ہے۔ انہوں نے کہاکہ حکومت کے اس فیصلہ سے اولا ٹیکسی کے تقریباً 40؍ہزار ڈرائیور بے روزگار ہوجائیں گے اور اکثر ٹیکسیاں قرضہ حاصل کرکے خریدی گئی ہیں۔ اب ان کی قرضہ کی قسط کس طرح ادا کرسکیں گے۔ انہوں نے کہاکہ اس فیصلہ سے تقریباً ’’ دولاکھ افراد کا گزر معاش متاثرہوگا اورٹیکسی خدمات پرمنحصر مسافروں کو بھی پریشانی کا سامنا ہوگا۔سدانندگوڑا نے کہا کہ اگر قوانین وضوابط کی خلاف ورزی ہوئی ہے تو حکومت متعلقہ کمپنی کے انتظامیہ کے خلاف کارروائی کرے۔ خدمات پر پابندی عائد کرنے سے مسئلہ حل نہیں ہوگا۔انہوں نے حکومت کی جانب سے اولا ٹیکسی پر پابندی ہٹائے جانے کا خیرمقدم کیا ہے۔ انہوں نے بتایا کہ ریاستی مخلوط حکومت کے اتحادیوں کے اختلافات کی وجہ سے اس مرتبہ بی جے پی کو زیادہ نشستیں حاصل ہوں گی۔ گوڑا نے کہاکہ کانگریس کی جانب سے ایڈی یورپا کے خلاف جاری کردہ ڈائری نقلی ہونے کا محکمہ انکم ٹیکس نے ثبوت پیش کردیا ہے جس سے کانگریس کو بڑا دھکہ پہنچا ہے اور اس کا اثر انتخابات پر پڑے گا۔ ایک سوال کے جواب میں سداننداگوڑا نے کہاکہ سابق وزیراعظم ایچ ڈی دیوے گوڑا کا بنگلور نارتھ پارلیمانی حلقہ سے مقابلہ کئے جانے کی توقع تھی اور انہیں بھی زندگی میں ایک مرتبہ دیوے گوڑا کے خلاف مقابلہ کرنے کی خواہش تھی۔ انہوں نے کہاکہ لیکن افسوس دیوے گوڑا نے مقابلہ سے پہلے ہی ہتھیار ڈال دئے اور دوسرے حلقہ کی جانب دلچسپی لے رہے ہیں۔