منگلورو: 2قاتلانہ حملوں کے معاملے میں پولیس نے کیا 6ملزمین کوگرفتار
منگلورو3؍اکتوبر (ایس او نیوز) گزشتہ دنوں ایک ہی دن میں کیے گئے دو الگ الگ قاتلانہ حملوں کے سلسلے میں پولیس نے 6ملزمین کو گرفتار کرلیا ہے۔
خیال رہے کہ 24ستمبر کو ہندتووادی لیڈر پرشانت پجاری قتل کیس میں ملزم بنائے گئے اور ضمانت پر رہا ہونے والے امتیاز (29سال)پر موڈبیدری میں قاتلانہ حملہ کیا گیا تھا جس میں وہ شدید زخمی ہواتھا۔شبہ تھا کہ پرشانت پجاری قتل کا بدلہ لینے کے لئے امتیاز کو قتل کرنے کی کوشش گئی ہے۔ اسی دن رات کے وقت گروپور کی عائشہ مسجد کے قریب سنگھ پریوارکے ایک لیڈرہریش شیٹی پر قاتلانہ حملہ کیا گیا ۔ ہریش کے ہاتھ اور پیر پر زخم آئے تھے۔
بتایا جاتا ہے کہ پولیس نے تحقیقات کے بعد موڈبیدری میں امتیاز پر ہوئے قاتلانہ حملے میں سورتکل کے رہنے والے دنیش (23سال)دھن راج (22سال) شاشوتھ(23سال) کو گرفتار کرلیا ہے۔جبکہ ہریش شیٹی پر گروپور میں پیش آئے ہوئے حملے کے معاملے میں کائکمباگروپور کے رہنے والے شریف(24سال)، سفاج(26سال)اور عارف(28سال) کو حراست میں لیا ہے۔پولیس کا کہنا ہے کہ ان دونوں معاملات میں مزید کچھ ملوث ہیں جنہیں جلد گرفتار کرلیا جائے گا۔