منگلورو:سات سال سے مفرور قتل کا ملزم الال میں گرفتار
منگلورو15؍فروری (ایس او نیوز) سال 2012میں راؤ اینڈ راؤ سرکل پر واقع کانچنا ٹیکسٹائل کے منیجر کو قتل کرنے کے الزام میں پولیس کو مطلوب ملزم محمداشرف عرف اچّو(40سال) کو الال کے قریب سے گرفتار کرلیا گیا ہے۔
بتایا جاتا ہے کہ کانچنا ٹیکسٹائل منیجردیپک کے قتل میں ملوث ہونے کا الزام لگنے کے بعد اشرف خلیجی ملک کو فرار ہوگیا تھا۔ اب پولیس کو خفیہ ذریعے سے اطلاع ملی تھی کہ گزشتہ ایک مہینے کے دوران اشرف کئی مرتبہ الال کے علاقے میں دیکھا گیا ہے۔اس کے بعد سٹی ساؤتھ کے اے سی پی کی قیادت میں اینٹی راؤڈی اسکواڈ نے جال بچھا کر اشرف کو گرفتار کرلیااور اسے بندر پولیس اسٹیشن کے حوالے کردیا گیا۔
پولیس کا کہنا ہے کہ اس قتل میں ملوث مزید تین ملزمین فرار ہیں، جن میں سے دو کے بارے میں اطلاع ملی ہے کہ وہ اس وقت کیرالہ میں ہیں۔ لہٰذا ان کی گرفتاری کے لئے بھی پولیس نے جال بچھا دیا ہے۔