منگلورو: بھاری برسات کا سلسلہ جاری۔ کئی مقامات پر چٹانیں کھسکنے کے واقعات۔ ڈی سی نے عوام کودی تعلقہ لیول کنٹرول روم سے رابطہ رکھنے کی ہدایت
منگلورو14؍اگست (ایس او نیوز) ساحلی علاقوں میں تیز اورموسلا دھار برسات کا سلسلہ ابھی جاری ہے۔ خاص کر منگلورو اور اڈپی کے بعض علاقوں میں لگاتار بارش برسنے کی خبریں موصول ہورہی ہیں۔
محکمہ موسمیات کی طرف سے جاری کردہ اعداد وشمار کے مطابق ضلع اڈپی میں سب سے زیادہ بارش ریکارڈ ہوئی ہے جوکہ 30.1سنٹی میٹر ہے۔جبکہ جنوبی کینرا میں 16.1سنٹی میٹر ،شمالی کینرا میں18.5سنٹی میٹراور کوڈاگو ضلع میں 19.4سنٹی میٹر برسات ریکارڈ کی گئی ہے۔
موسلادھار برسات کی وجہ سے ضلع جنوبی کینرا میں نیتراوتی ندی میں سیلاب آگیا ہے اور وہ خطرے کے نشان کو چھونے لگی ہے ، جس سے ندی کے کنارے بسنے والوں میں خوف و دہشت پید ا ہوگئی ہے۔منگل کے دن بھی ضلع ڈپٹی کمشنر نے اسکولوں اور کالجوں کے لئے تعطیل کا اعلان کیا۔شیشیل مندر کے قریب سے بہنے والی کپیلا ندی میں بھی سیلابی کیفیت پیداہوئی ہے اور مندرسے رابطے کا راستہ اور پل دونوں پانی میں ڈوب گئے ہیں۔بعض علاقے تو زیر آب ہونے کی وجہ سے جزیروں میں بدل گئے ہیں۔
اس دوران کئی مقامات پر چٹانیں کھسکنے کے واقعات پیش آئے ہیں۔شیراڈی گھاٹ اور چارمڈی گھاٹ پرجگہ جگہ چٹانیں کھسکنے اور مٹی کے تودے ہائی وے پر جمع ہوجانے سے موٹرگاڑیوں کی آمد ورفت بند ہوگئی ہے۔گھاٹ پر پھنسے ہوئے مسافر بڑی بے بسی اور مشکل حالات سے گزر رہے ہیں۔بتایا جاتا ہے کہ ہائی وے اور دیگر سڑکوں پر گری ہوئی مٹی کے ڈھیر کو ہٹانے کی مہم چل رہی ہے۔ پتور کے قریب منگلورو بنگلورو ہائی وے پر بھی چٹان کھسک گئی ہے جس سے یہ سڑک ٹریفک کے لئے بند کردی گئی ہے۔مغربی گھاٹ کے علاقوں میں سکلیشپور اور مڈی کیرے وغیرہ میں بھی چٹانوں کے کھسکنے سے موٹر گاڑیوں کی آمد و رفت روک دی گئی ہے۔
ڈپٹی کمشنر کی طرف سے جاری اخباری بیان کے مطابق ضلع جنوبی کینرا میں بھاری برساتوں کی وجہ سے عوام کو درپیش خطرات اور مشکلات کو سامنے رکھتے ہوئے تعلقہ وار کنٹرول روم قائم کیے گئے ہیں جو 24x7 عوامی رابطے کے لئے دستیاب رہیں گے۔ ڈی سی نے عوام کو ہدایت دی ہے کہ کسی بھی مشکل اور دشواری کی صورت میں وہ متعلقہ کنٹرول روم سے رابطہ قائم کریں۔ تعلقہ وار کنٹرول روم اور ان کے ٹیلی فون نمبر یوں ہیں:
منگلورو: 2220596؍0824-2220587 منگلورو سٹی کارپوریشن: 0824-2220306
بنٹوال: 232500 ؍ 08255-232120 موڈ بیدری: 239900 ؍08258-238100
پتور: 232799؍ 08251-230349 بیلتھنگڈی: 233123 ؍08256-232047
سولیا: 231231 ؍08257-230330 کڈبا: 08251-260435
مولکی: 0824-2294496