منگلورو:18/اپریل(ایس اؤ نیوز)اپنی ریاست کے تحفظ کے لئے نوآبادیاتیوں کے خلاف جدوجہد کرتےہوئے اپنی جان تک قربان کرنے والے شیر میسور ٹیپو سلطان ؒ کی یاد میں کرناٹکا کوموسوہاردا ویدیکے اور یکساں ذہنیت والے روشن خیال اداروں اورتنظیموں کے اشتراک سے 4 مئی کو میسور میں ٹیپو سلطان ؒ بیداری اجلاس منعقد کیاجارہا ہے، اس بات کی  جانکاری کوموسوہاردا ویدیکے کے ریاستی جنرل سکریٹری کے ایل اشوک نے دی۔

منگلورو میں پریس کانفرنس میں انہوں نے اجلاس کی تفصیل بتاتے ہوئے کہاکہ اجلاس سےپہلے سری رنگاپٹن سے جلوس  نکالا جائے گا۔ انہوں نے ٹیپو سلطان ؒ کے متعلق بتایا کہ11مئی 1799کو ٹیپوسلطانؒ سامراجی قوتوں کے خلاف جدوجہد کرتے ہوئے میدان جنگ میں شہید ہوئے، کرناٹکا کی تاریخ کا مطالعہ کریں تو ٹیپو سلطان ؒ واحد راجا ہے جنہوں نے انتظامی امور میں انقلابی تبدیلیاں کیں، اراضی میں سدھار، فوجیوں میں زمینات کی تقسیم ، آب پاشی اور ترقی کے لئے دور اندیش منصوبے اور فکر، مضبوط معاشی نظام، مذہبی رواداری جیسی خصوصیات تمام سیاسی پارٹیوں کے لئے ایک عملی اور مثالی نمونہ ہیں۔ نشہ بندی ، خواتین کے حقوق کی پاسداری، مزدوروں ، دستکاروں کوترغیب دینے کے لئے سماجی بہتری کے منصوبے آفاقی ہیں، لیکن ٹیپوسلطان ؒ کی ان خصوصیات کو شک کی نگاہ سے دیکھا جاتاہے، فرقہ وارانہ عینک سے جانچ کی جاتی ہے، اس کو دورکرنے ، عوام میں بیداری پید اکرنے کے لئے 4مئی کے دن کو منتخب کئے جانے کی بات کہی۔

4مئی کو بیداری مہم کا اختتامی اجلاس میسور کے وستوپردرشن میدان میں منعقد ہوگا، اجلاس میں میسور ضلع اور ریاست کے دیگرمقامات سے قریب 6ہزارلوگ شرکت کرنے کی جانکاری کے ایل اشوک نے دی۔ پریس کانفرنس میں کوموسوہاردا ویدیکے کے ضلع صدر سریش بھٹ باکرا بائیل، مسلم لیکھکر سنگھ کے صدر عمر یو ایچ، دکشن کنڑاایس آئی اؤ کے ضلعی صدر طلحہ اسماعیل، سماجی کارکن نرمل کمار، شبیر وغیرہ موجود تھے۔