خود کو امت شاہ کا بھانجہ بتا کر بی جے پی ممبر اسمبلی کو لگایا چونا
بھوپال، 30؍جولائی(ایس اونیوز/آئی این ایس انڈیا )مدھیہ پردیش کے اجین میں دھوکہ دہی کا ایک انوکھا معاملہ روشنی میں آیا ہے۔یہاں ایک شخص نے اجین جنوب کے رکن اسمبلی موہن یادو کے قریبی کو تقریباََ 80ہزار روپے کا چونا لگا دیا اور یہ سب اس نے بی جے پی کے قومی صدر امت شاہ کا نام لے کر کیا۔اجین جنوب سے بی جے پی کے رکن اسمبلی موہن یادو کے پاس 27؍جولائی کو ایک فون آیا۔فون کرنے والے شخص نے خود کومت شاہ کا بھانجہ وراج شاہ بتایا اور اجین میں اپنے ساتھ ہوئی لوٹ کی کہانی سنائی۔اپنے قومی صدر کا نام سن کربی جے پی ممبر اسمبلی موہن یادو نے بھی معاملے کو سنجیدگی سے لیا اور اپنے ایک ساتھی اور پارٹی کارکن نریش شرما کو جی آر پی تھانہ بھیج دیا۔اس کے بعد خود کو وراج شاہ بتانے والے شخص نے نریش سے فون اور آئی پیڈ کے بھی چوری ہونے کی بات کہہ کر15ہزار کا نیا فون لے لیا۔اس کے بعد اس نے روپے بھی چوری ہوجانے کا دعوی کیا، جس کے بعد موہن یادو نے اپنے ساتھی کو 65ہزار روپے وراج کو دینے کو کہا۔وراج نے احمد آباد پہنچتے ہی روپے لوٹانے کا وعدہ کیا لیکن احمد آباد پہنچنے کے بعداس نے ٹیکسی کو واپس روانہ کر دیا اور اپنا موبائل بند کر کے فرار ہو گیا۔