بھٹکل  14؍اگست (ایس او نیوز)  ساحلی علاقوں میں بھاری بارش کا سلسلہ جاری ہے اور پوری رات ان علاقوں میں زبردست بارش ہوئی ہے۔ آج صبح ویسے کچھ دیر کے لئے بارش رُکتے رُکتے گررہی ہے، مگر اسمان مکمل طور پر ابرآلود ہے۔

بھاری بارش کے دوران ضلع اُتر کنڑا کے یلاپور کے قریب اربئیل گھاٹ پر ایک چٹان کھسکنے کی اطلاع موصول ہوئی ہے، جس کے نتیجے میں  نیشنل ہائی وے 63پرہبلی سے انکولہ کی طرف سفر کرنے کرنے والی موٹر گاڑیوں کی آمد و رفت قریب چار گھنٹوں کے لئے پوری طرح بند ہوگئی تھی ۔لیکن اب بتایا گیا ہے کہ پولیس کی مسلسل کوششوں کے بعد صبح آٹھ بجے سڑک کی صفائی مکمل ہوگئی ہے اور راستہ کو سواریوں کے لئے کھول دیا گیا ہے۔

اطلاع  کے مطابق یلاپور میں چٹان کھسکنے کا یہ واقعہ صبح 4بجے کے وقت پیش آیا۔ بتایا گیا ہے کہ جس وقت چٹان کھسکی، اُسی وقت متعلقہ مقام پر سے  ایک پرائیویٹ بس گذر رہی تھی، ڈرائیور نے فوری بریک لگاتے ہوئے  بس کو تھوڑا پیچھے لے لیا۔ اطلاع کے مطابق  بس پر تھوڑی بہت  مٹی گرگئی،  مگر خوش قسمتی سے کسی بھی مسافر کو کوئی نقصان نہیں پہنچا۔ ہائی وے پر مٹی کا ڈھیر لگ جانے کے بعد دونوں طرف موٹر گاڑیوں کی قطار لگ گئی۔

صبح 6بجے سے پولیس نے کئی جے سی بی مشینوں کے ذریعے یہاں سے مٹی ہٹانے کا کام شروع کیا اور تقریباً دو گھنٹے تک مسلسل مشقت کے بعد صبح 8بجے ٹریفک کے لئے راستہ صاف ہوگیا۔سڑک پر رکاوٹ کی وجہ سے گھنٹوں پھنسے رہنے والے مسافروں نے راحت کی سانس لی۔ بتایا گیا ہے کہ پولس نے  جے سی بی مشینوں کی مدد سے سڑک پر گری ہوئی مٹی ، کیچڑ وغیرہ کو ہٹادیا ہے اور ہائی وے پر ٹریفک کو دوبارہ بحال کردیا ہے۔

بھٹکل سمیت پورے شمالی کینرا، پڑوسی اضلاع اُڈپی، شموگہ اور جنوبی  کینرا میں بھی زبردست بارش ہونے کی اطلاعات موصول ہورہی ہیں اور بارش نے ان تمام اضلاع میں عام زندگی مفلوج کرکے رکھ دی ہے۔