پاپولر فرنٹ کے خلاف بی جے پی یووا مورچہ کا ٹارچ لائٹ مظاہرہ
کنداپور 22؍اگست (ایس او نیوز)کرناٹکا میں ہندو لیڈروں اور رضاکاروں کے قتل میں براہ راست پی ایف آئی اور کے ایف ڈی کے ملوث ہونے کا الزام لگاتے ہوئے بی جے پی یو وا مورچہ کی طرف سے جلتی ہوئی شمعیں(ٹارچ لائٹ)لے کر احتجاجی مظاہرہ منعقد کیا گیا۔جس میں مطالبہ رکھا گیا کہ ان تنظیموں پر مکمل پابندی لگادی جائے، کیونکہ یہ تنظیمیں خوف و دہشت کا ماحول پیدا کررہی ہیں۔
مظاہرین سے خطاب کے دوران بی جے پی کے ضلعی نائب صدربائکاڈی پرساد شیٹی نے کہا کہ اب" ہندورضاکار پی ایف آئی اور کے ایف ڈی جیسے شیطانوں کا خاتمہ کرنے کے لئے بھگوان کرشن کا روپ دھار لیں گے۔"اس کے علاوہ مظاہرین نے وزیررماکانت رائے کے استعفے کا بھی مطالبہ کیا۔بی جے پی کے ریاستی صدر یڈی یورپا کے خلاف سرکاری طورپر جھوٹے مقدمات دائر کرنے کی بھی مذمت کی گئی۔
پرساد شیٹی کا کہنا تھا کہ جن سنگھ کا قیام سیاست اور اقتدار پانے کے لئے نہیں کیا گیا تھابلکہ ملکی سالمیت کو برقرار ہمار ا مقصد ہے اور ہم اس کے لئے کوئی بھی قربانی دینے کے لئے تیار ہیں۔ہندو لیڈروں کے خلاف سرگرم تنظیموں کے ساتھ اگرحکومت نرمی کا برتاؤ کرتی ہے تو ہم تماشائی بن کر خاموش نہیں بیٹھیں گے۔ ہماری لڑائی اس وقت تک جاری رہے گی جب تک پی ایف آئی اور کے ایف ڈی جیسی تنظیموں پر پوری طرح پابندی نہیں لگ جاتی۔
ایم ایل سی کوٹا سرینواس پجاری، سریش شیٹی،ستیش پجاری اور دیگر بی جے پی لیڈروں ا و ررضاکاروں کی کثیر تعداد احتجاجی مظاہرے میں شریک رہی۔
