کمٹہ میں دارالعلوم کا سالانہ اجلاس، طلبہ کا خوبصورت تفریحی پروگرام، علمائے دین کا خطاب
کمٹہ 13؍مئی (ایس او نیوز)کمٹہ کے فاروقی محلہ میں مدرسہ دارالعلوم اور مدرسہ دارالامان للبنات کا سالانہ اجلاس بڑے شاندار انداز میں منایا گیا۔اس جلسے کا اہتمام جماعت المسلمین فاروقی محلہ،المنار یوتھ کلب اور الثناء ویلفیئر ایسو سی ایشن کے اشتراک سے کیا گیا تھا۔
بعد نماز عشاء سالانہ جلسے کا آغاز عبدالرحمن عبدالحمید کی تلاوت کلام پاک سے ہوا۔ جس کے بعد آفرین ابو صالح بمبئی کار نے حمد اور مفیز ابراہیم نے نعت بڑی ہی خوش الحانی سے پیش کی۔اس موقع پر مہمان خصوصی کے بطور تشریف فرما جامعہ اسلامیہ بھٹکل کے مہتمم مولانا مقبول کوبٹے صاحب نے جلسے سے خطاب کرتے ہوئے کہا کہ ہر مسلمان کے لئے لازم ہے کہ وہ حضور اکرمﷺ کی تعلیمات کے مطابق اپنی زندگی بسر کرے اور آپؐ کے نقش قدم پر چلتا رہے۔کیونکہ آپؐ کی تعلیمات میں ہماری دنیاوی و اخروی زندگی کی کامیابی پوشیدہ ہے۔
مولانا محمد الیاس ندوی جنرل سکریٹری ابوالحسن اسلامک اکیڈیمی نے بھی اپنے بیان میں اسلامی تعلیمات کی افادیت اور اس میں موجود فلاح دارین کے مختلف گوشوں پر روشنی ڈالتے ہوئے بتایا کہ ہر مومن کو اپنی زندگی حضور ﷺ کی تعلیمات کے سانچے میں ڈھالنا چاہیے، تا کہ دنیا اور آخرت کی بھلائی اور کامیابی سے سرفراز ہوسکے۔
جلسے کے دوران دارالعلوم کے طلبہ و طالبات نے خوبصورت تفریحی پروگرام پیش کیا، جسے حاضرین نے بہت ہی پسند کیا۔ابتدا میں جناب ایوب معلم نے حاضرین کا استقبال کیا جبکہ نظامت کی ذمہ داری علی تانجی اور محمد غوث بومبائیکر نے جلسے کی نظامت کی۔
جناب عبدالرحمن ڈانگی جامعی، حافظ ابو صالح صاحب، جناب آدم حسین صاحب (صدر فاروقی محلہ جماعت المسلمین) جناب محمد محسن قاضی (جنرل سکریٹری نارتھ کینرا مسلم یونائٹیڈ فورم) جناب امان اللہ شمالی (سابق صدر ونلّی جماعت المسلمین) کے علاوہ بہت ساری اہم شخصیات اسٹیج پر جلو ہ افروز تھیں۔