کاسرگوڈ،15؍اکتوبر(ایس او نیوز)نیشنل ہائی وے پر کمبلے برڈج کے قریب پیش آنے والے ٹرک اور کنٹینرکے تصادم میں ایک شخص ہلاک ہوگیا ہے ، جبکہ چار دیگر افراد زخمی ہونے کی اطلاع موصول ہوئی ہے۔

حادثے میں ہلاک ہونے والے شخص کا نام بیجو یلّا ملّور (45سال) جو مچھلیوں سے بھری ہوئی لاری کا ڈرائیور تھا۔جبکہ اس کے ساتھ سفر کرنے والا بابو (39سال)شدیدزخمی ہوگیا ہے اور اسے علاج کے لئے منگلورو اسپتال میں منتقل کیا گیا ہے۔دیگر زخمیوں میں سے دو کی شناخت اتر پردیش کے سنتوش اور سانتین کے طور پر کی گئی جو کہ کنٹینر میں سوار تھے۔کہا جاتا ہے کہ مچھلی سے بھری ہوئی لاری منگلورو سے کیرالہ میں الاپوزا کی طرف جارہی تھی جبکہ کنٹینر ٹرک منگلورو کی طرف آرہا تھا۔ تصادم کے بعد کنٹینر ٹرک الٹ کر سڑک کے کنارے نالے میں جاگرا۔تھوڑی دیر کے لئے نیشنل ہائی وے پر سواریوں کی آمد و رفت متاثر رہی۔ فائر بریگیڈ اورکمبلے اسٹیشن سے وابستہ پولیس عملے نے موقع پر پہنچ کر حالات پر قابو پالیا۔