کاروار20فروری (ایس او نیوز) وزیر برائے بھاری صنعت آر وی دیشپانڈے نے کہا ہے کہ محکمہ ریلوے اور ریاستی حکومت کے اشتراک سے بنگلورو۔ میسورو ریلوے ٹریک کو ڈبل لائن میں تبدیل کرنا اور اس کا مکمل بجلی کرن (الیکٹری فکیشن)کرنا ریاستی حکومت کا ایک اہم کام ہے۔

انہوں نے بتایا کہ محکمہ ریلوے اور ریاستی حکومت کے اشتراک سے دو منصوبوں پر عمل کیا جاناتھا جس کا تخمینہ990کروڑ روپے تھا۔ اس لاگت میں ریاستی حکومت کو 581کروڑ روپوں کا حصہ شامل ہے۔ بنگلورو اور میسورو کے درمیان 138کیلو میٹر طویل ٹریک کو ڈبل لائن میں تبدیل کرنے اور اس کا بجلی کرن کرنے کا منصوبہ سال 2010-11میں شروع ہوا تھاجوتین مرحلوں میں گزشتہ دس برسوں کے دوران انجام دیا گیا ہے۔وزیر موصوف نے بتایا کہ ڈبل لائن کی تعمیر کے وقت سب سے بڑی رکاوٹ سری رنگاپٹنم میں پیش آئی جہاں صدیوں پرانا ٹیپوسلطان کے ہتھیاروں کا میوزیم موجود تھا۔ 900ٹن وزنی اس میوزیم کو ذرابھی نقصان پہنچائے بغیر ریلوے ٹریک کے راستے سے ہٹاکر دوسری جگہ منتقل کرنا ایک بڑا کارنامہ تھا جسے انجام دیا گیا۔انہوں نے کہا کہ اس ٹریک کا بجلی کرن کرنے سے دو شہروں کے درمیان روزانہ اور وقتاًفوقتاً سفر کرنے والے ہزاروں مسافروں کے لئے بڑی سہولت ہوجائے گی، اور دوسری طرف محکمہ ریلوے کوسالانہ 20کروڑ روپوں کی بچت ہوجائے گی۔