کاروار: مندر انتظامیہ کمیٹیوں نے مندر حساب کتاب کی آڈٹ رپورٹ ڈی سی کو نہیں سونپی:7سالوں میں 1618.39 لاکھ روپئے منظور
کاروار:7/ اکتوبر (ایس اؤنیوز)گذشتہ 7سالوں سے اترکنڑا ضلع کے مختلف مندروں کو ریاست کے مجرائی محکمہ کی طرف سے عام منصوبے کے تحت 1618.39لاکھ روپئے کی امداد منظور کی گئی ہے مگر قانون کے مطابق ان میں سے کسی مندر نے بھی ضلع انتظامیہ کو مندروں کے اخراجات کے حساب کتاب کی آڈٹ رپورٹ نہیں سونپے جانےپر تعجب کا اظہار کیا جارہاہے۔
مندروں کے حساب کتاب کو شفاف رکھنے کی نظر سے مندروں کے جمع خرچ کی رپورٹ ضلع ڈپٹی کمشنر کو نہیں سونپے جانے سے عوامی سطح پر تعجب کا اظہار کیا جارہاہے جب کہ ضلع میں ضلع دھارمک پریشد کی طرف سے مندروں کے لئے انتظامی امور کی کمیٹی تشکیل دئیے جانے پر برہمی کااظہار کیا گیا تھا۔ خیال رہے کہ اترکنڑا ضلع کی کل 662منادر مجرائی محکمہ کی فہرست میں درج ہیں۔
گذشتہ 7سالوں میں مجرائی محکمہ کی زیر نگرانی والی کل 612مندروں کو مجرائی محکمہ کی طرف سے 1618.39لاکھ روپئے بطور امداد جاری کئے گئے ہیں۔ جس میں 1509.89لاکھ روپئے خرچ کئے جاچکے ہیں ۔ سال 2017-2018کے تحت منظور شدہ 108.50لاکھ روپئے کی امداد باقی ہے۔ یہاں مندروں کو کن ذرائع اور وسائل سے آمدنی ہوئی ہے، کن مدات پر خرچ کیا گیا ہے اس کی آڈٹ رپورٹ ڈی سی کو سونپنے کی بات قانون میں کہی گئی ہے۔ اس کے باوجود کسی مندر نے بھی کوئی رپورٹ نہیں سونپی ہے۔ شفافیت اور عوامی جانکاری کے لئے ریاستی کی رئیس مندر سبرامنیا مندر کمیٹی اپنی آڈٹ رپورٹ کی تفصیلات ویب سائٹ پر شائع کرتی ہے، لیکن ضلع کی ایک بھی مندر انتظامیہ کی طرف سے آڈٹ رپورٹ نہیں دئیے جانے پر تعجب کااظہار کیا جارہاہے۔