کاروار:16/ اکتوبر (ایس اؤنیوز)عین فصل کاٹنے کے وقت ہی پچھلے دو دنوں سے برس رہی زوردار بارش سے جہاں عوام خوف زدہ ہیں وہیں کسانوں کے لئے رحمت کے مساوی بارش سے کافی نقصان کا خطرہ محسوس کیا جارہاہے۔ موسلا دھار بارش سے دھان کی فصل کو کافی نقصان ہونےکی اطلاعات موصول ہوئی ہیں۔

تعلقہ کے بینگا، توڈور، آمدلی ، مدگا سمیت کئی دیہات کے نشیبی علاقے آب دوز ہوگئے ہیں اورفصل کو گھر لانےکے انتظارمیں رہنے والے کسان اچانک برستی ہوئی بارش سے فصل کی بربادی سے کنگال ہوگئےہیں۔ آمدلی کا اہم نالے کے کنارے والی حد ٹوٹ جانےسے بالےراشی کے تھاکوگوڈا کا کھیت پوری طرح جل تھل ہوگیاہے۔ صرف 15دنوں کے بعد کسان فصل کاٹ کر گھر لےجانےکی خوشی میں تھے۔

پہاڑوں سے بہنے والا بارش کا پانی نالے کے ذریعے سمندر میں جاملتاہے۔ لیکن نالے کی طغیانی سے پانی راہ بدلنے کے اندیشے تھے اور پانی رہائشی اور زرعی علاقوں کے اندر گھسنے کا خطرہ تھا سب کچھ پتہ ہونے کے باوجود پنچایت کی جانب سے کوئی تحفظاتی اقدامات نہیں کئے گئے ہیں۔ دیہی عوام نے ہی اپنی حفاظت کے لئے تعمیر کردہ عارضی دیوار موسلا دھار کی مار سے منہدم ہوگئی ہے۔ یہ ہرسال کا روناہے، مسئلے کو لے کر کئی مرتبہ پنچایت سے درخواست کی گئی لیکن کوئی کام نہیں ہونے کی مکینوں کی شکایت کی ہے۔

نقصانات کے متعلق مقامی تحصیلدار جی این نائک نے کہاکہ بارش سےہونے والے نقصانات کا جائزہ لیاجارہاہے، دھان کے کھیتوں میں پانی گھسنے سے کافی نقصان ہونے کا پتہ چلاہے ، حالات کا پورا معائنہ کرنےکے بعد اگلاقدم اٹھانے کی بات کہی۔