ہندوستان نے اسکریم جیٹ راکٹ انجن کا کامیاب ٹیسٹ کیا
بنگلور، 28؍اگست(ایس او نیوز/آئی این ایس انڈیا)کچھ ممالک کے چنندہ کلب میں شامل ہوتے ہوئے ہندوستان نے آج اپنے جدید اسکریم جیٹ راکٹ انجن کا کامیاب تجربہ کیا۔فضائی آکسیجن کا استعمال کرتے ہوئے انجن کولانچ کیا گیا جس سے لانچنگ کی لاگت کئی گنا کم ہو سکتی ہے اور ہوا سے آکسیجن لینے والے انجن ڈیزائن کرنے کے اسرو کی کوشش میں مدد مل سکتی ہے۔ہندوستانی خلائی تحقیق کے ادارہ نے کہا کہ آندھرا پردیش کے شری ہری کوٹہ میں ستیش دھون خلائی سینٹر سے صبح 6 بجے اسکریم جیٹ انجن کے پہلے تجرباتی مشن کا کامیابی کے ساتھ ٹیسٹ کیا گیا۔اسرو نے مشن کو عام لیکن ہوا سے آکسیجن لے کر چلنے والے جدیدترین انجنوں کے ڈیزائن اور اس کو ترقی دینے کی کوشش میں اہم سنگ میل قرار دیا۔امریکہ، روس اور یورپی خلائی ایجنسی کے بعد اسکریم جیٹ انجن کا لانچنگ ٹیسٹ کرنے والا ہندوستان دنیا کا چوتھا ملک ہے۔اسرو نے کہا کہ 12گھنٹے کے بلاتعطل الٹی گنتی کے بعد اسکریم جیٹ انجن کو لے کر جدید ٹیکنالوجی یان(اے ٹی وی )نے صبح 6 بجے پرواز بھری اور 300سیکنڈ کی پرواز شری ہری کوٹا سے تقریبا 320کلومیٹر دور خلیج بنگال میں ختم ہوئی۔اسرو کے مطابق اس لانچ کے پانچ اہم مراحل منصوبہ کے مطابق اختتام پذیر ہوئے۔
مودی نے اسکریم جیٹ راکٹ انجن کے کامیاب ٹیسٹ کے لیے اسرو کو مبارکباد دی
وزیر اعظم نریندر مودی نے اسکریم جیٹ راکٹ انجن کا کامیاب ٹیسٹ کرنے کے لیے ہندوستانی خلائی تحقیق کے ادارہ (اسرو) کے سائنسدانوں کو آج مبارکباد دی اور کہا کہ انہوں نے ایک بار پھر ہندوستان کا سر فخرسے اونچا کردیا ہے۔مودی نے ٹوئٹ کیاکہ اسکریم جیٹ راکٹ انجن کا کامیاب ٹیسٹ ہمارے سائنسدانوں کی محنت اور قابلیت کا ثبوت ہے۔اسرو کو مبارک باد ۔انہوں نے کہاکہ ہم نے بار بار دیکھا ہے کہ ہمارے سائنسدانوں اور خلائی پروگرام نے کیسے ہندوستان کو بہت زیادہ فخرمحسوس کرایا ہے۔فضا میں موجود آکسیجن کا استعمال کرنے والا مستقبل کے اسکریم جیٹ راکٹ انجن کا کامیاب ٹیسٹ کرکے ہندوستان مخصوص ممالک کی فہرست میں شامل ہو گیا ہے۔اس سے لانچنگ کی لاگت میں کئی گنا کمی لانے میں مدد مل سکتی ہے۔اسرو نے کہا کہ اسکریم جیٹ راکٹ انجن کا پہلا تجرباتی ٹیسٹ آندھرا پردیش کے شری ہری کوٹا میں واقع ستیش دھون خلائی مرکز سے صبح 6 بجے کیا گیا۔امریکہ، روس اور یورپی خلائی ایجنسی کے بعد ہندوستان اسکریم جیٹ انجن کا تجرباتی ٹیسٹ کرنے والا چوتھا ملک بن گیا ہے۔