غازی آباد،13؍مئی(ایس او نیوز؍آئی این ایس انڈیا)دو دن پہلے دہلی اور کانپور سے سٹے باز گینگ پکڑنے کے بعد اب غازی آباد سے پانچ اور سٹے بازوں کو 70 ہزار روپے کے ساتھ گرفتار کیا گیا ہے۔ کہا جا رہا ہے ان سٹے بازوں کا تعلق انڈین پریمیئر لیگ (آئی پی ایل) سے ہے جو اس سیشن میں سٹہ لگا رہے تھے۔ اس سے پہلے جمعرات (11 مئی، 2017) کو کانپور کے ایک ہوٹل سے رمیش شاہ، وکاس چوہان اور رمیش کو گرفتار کیا گیا تھا۔ اس دوران پولیس نے ملزمان سے 4.4 لاکھ روپے، دو موبائل فون اور ایک ڈائری بھی برآمد کی تھی۔ یہ گرفتاریاں دہلی ڈیر ڈیولس اور گجرات لائنز کے درمیان کھیلے گئے میچ سے پہلے کی گئی تھیں۔ خبر کے مطابق پکڑے گئے ملزمان میں سے ایک گراؤنڈمین بھی شامل ہے۔بتا دیں کہ آئی پی ایل میچوں میں اسپاٹ فکسنگ کا کوئی نیا معاملہ نہیں ہے۔ اس سے پہلے تیز گیند باز سری سنت، اجیت چنڈیلا اور انکت چوہان پر سپاٹ فکسنگ کے الزام لگے تھے، جس کے بعد ایس سری نواسن کے داماد گروناتھ میپپن کو بھی گرفتار کیا گیا تھا۔