ممبئی، 14؍مئی(ایس او نیوز؍آئی این ایس انڈیا )ممبئی سے ملحق کاشی میرا علاقے میں آئی پی ایل میچ پر سٹہ لگانے کے الزام میں دو افراد کو گرفتار کیا گیا ہے۔تھانے پولیس(دیہات ) کی خصوصی ٹیم نے سٹے بازی کے الزام میں گرفتاری کی ہے۔گرفتار ملزمان کے پاس سے 76610ہزار روپے اور سٹے کے لیے استعمال کئے جانے والے کچھ آلات اور لٹریچر بھی برآمد کئے گئے ہیں ۔پولیس سے حاصل ہوئی معلومات کے مطابق ،تھانے پولیس سپرنٹنڈنٹ ڈاکٹر مہیش پاٹل نے علاقے میں بڑھتی ہوئی مجرمانہ وارداتوں کو روکنے کے لیے ایک خصوصی ٹیم تشکیل دی ہے، جو تھانے کے دیہی علاقوں میں چلنے والی غیر قانونی سرگرمیوں پر مسلسل کارروائی کر رہی ہے۔سنیچر کی رات پولیس ڈپٹی سپرنٹنڈنٹ نکول نیامنے کی قیادت میں خصوصی ٹیم نے کاشی میرا کے شیوانی گیسٹ ہاؤس کے کمرے نمبر 212میں چھاپہ مارا، وہاں گجرات لاینس اور سن رائزرس حیدرآباد کے درمیان چل رہے میچ پر سٹہ لگایا جا رہا تھا۔پولیس نے موقع پر موجود 37سالہ محمد افضل خان اور 31سالہ وجے دلیپ کوریل کو گرفتار کرلیا ، جبکہ ان کے تین ساتھی فرار ہونے میں کامیاب رہے۔پولیس نے ملزمان کے پاس سے سٹہ کھیلنے میں استعمال ہونے والے آلات سمیت 76610ہزار روپے نقد بھی ضبط کیا ہے اور باقی فرار ملزمان کی تلاش میں مصروف ہے۔