نئی دہلی،20؍مئی(ایس او نیوز؍آئی این ایس انڈیا) اریجو میں کھیلے گئے دوستانہ میچ میں اٹلی کی انڈر 17 ٹیم پر 2-0 سے تاریخی جیت درج کرنے پر ہندوستان کی انڈر 17 ٹیم کو دھماکہ خیز بلے باز وریندر سہواگ اور بالی وڈ اداکار ابھیشیک بچن سمیت اعلی شخصیات نے مبارک باد دی ہے۔سہواگ نے اپنے انداز میں ٹیم کو مبارکباد دیتے ہوئے کہا،کہ ہم نے اٹلی کو شکست دی ہے، شاندار جیت پر انڈر 17ہندوستانی فٹ بال ٹیم کو مبارکباد، اٹلی کی اڈلی بن گئی۔بالی ووڈ اداکار ابھیشیک بچن نے مبارکباد دیتے ہوئے کہا کہ ہندوستانی انڈر 17 ٹیم کو بہت بہت مبارک ہو، جنہوں نے اٹلی کو2-0 سے شکست دی، یہ آنے والے کل کی نشانی ہے۔ ہندوستانی ٹیم کے چیف کوچ اسٹیفن کاسٹیٹان نے اٹلی کے خلاف شاندار فتح کے لئے پوری ٹیم کی تعریف کی۔ انہوں نے کہا کہ یہ جیت پوری ٹیم کی محنت کا پھل ہے۔اے آئی ایف ایف پلیئر آف دی ایئر 2016 منتخب کئے گئے جے جے لال پیکھلا نے شاندار کارکردگی کے لئے لڑکوں کو مبارک باد دی۔ڈفینڈر سندیش جگن اور گرپریت سنگھ سندھو نے بھی ہندوستانی انڈر 17 ٹیم کی تعریف کی۔ہندوستان کے اسٹار فٹ بالر سنیل چھیتری طرف سے مبارک باد دیتے ہوئے کہا کہ اٹلی کے خلاف ہندوستانی انڈر17 فٹ بال ٹیم کو اراکین کو مبارک ہو، محنت کرو اور معجزے ہوں گے!۔